林家棟早前因超速駕駛而被罰停牌六個月，昨日首天復牌，他便懷着興奮心情往運輸署領回牌照，除即時駕着其平治大過手癮外，更急不及待到車行睇車，並看中一部價值十八萬元的Prius環保車。
林家棟今年四月因超速駕駛而被罰三千元及停牌六個月，首天復牌的家棟昨早到位於金鐘的運輸署領回牌照，之後更馬上驅車到車行睇車，表現極興奮。
昨早十一時許，一身便服打扮的家棟由女助手駕着其平治房車，直往金鐘運輸署。家棟在運輸署內逗留約五分鐘，領回牌照後便匆匆取回其平治座駕，並登上司機位，駕車往灣仔告士打道的豐田車行睇車。
家棟進入車行後，與車行經紀密密斟。家棟一邊看車輛簡介，一邊看車，逗留約十多分鐘後，便駕着平治離開。據知家棟看中了一部價值約十八萬元，豐田新推出的Prius環保車，並已約好日內試車。
事後記者致電家棟，他在電話中亦難掩興奮心情，他說：「今日攞番個牌極度興奮，好開心呀，第一時間就揸車先，但我有提醒自己唔好咁快，因為之前停牌太痛苦。我住得遠（清水灣），又冇得車阿媽出入，雖然我好願意幫助啲的士司機，振興香港經濟，但小數怕長計，日日咁搭都唔係辦法。」
去年家棟才購下一輛標緻七人車，昨日又往車行睇車，問他是否打算換車？家棟說：「我係想換車㗎，我睇中架Prius。呢架車係用電油同電混合行車，係環保車嚟嘅，好慳油，而且車速冇咁快，我過幾日會試車，當係獎勵吓自己囉。」
採訪：朱倬誼 攝影：娛樂突發組
