雖然古華特話唔想離開巴塞隆拿，但前晚就親身去到英國，幫某電視台做歐冠盃評述；佢咁樣做，唔知有乜嘢象徵意義呢？
當我求大俠見到古華特佢前晚喺公仔箱出現，重同紐卡素前鋒舒利亞及布力般領隊桑拿士齊齊講歐冠盃，真係眼到凸埋。事關巴塞禮拜日會喺西甲聯作客對馬略卡，但古華特不得止唔留低備戰，重抽時間飛去英國講波，你話冇景轟就假。
古華特日前講過想留喺巴塞，但弊在啲球迷唔鍾意佢，所以佢絕對有離隊嘅可能；而睇佢前晚一身嘅裝扮，黑白花恤衫襯黑色皮褲，咁啱就同紐卡素嘅球衣顏色一模一樣。但睇到着住套整齊西裝嘅舒利亞瞄佢嘅神情，似乎唔太認同佢嘅衣着品味。
兩個禮拜前華倫作客卡斯特朗嘅西班牙盃首圈比賽，因球證俾人掟中嘢而要被腰斬，喺禮拜三閉門補賽，踢埋餘下嗰七分鐘，由比數一比一同華倫射十二碼開始，點知米斯達宴客，由巴拉查補射得手，及後簡奴比奧再入一粒，華倫終勝出三比一，呢場波真係夠戲劇性又夠晒騎呢啩！
國米呢排真係衰到貼地，意甲不濟後炒咗教練古柏，即刻喺歐冠盃大敗畀火車頭，近日更有前鋒卡隆服用禁藥諾龍，如果第二次測驗再呈陽性反應的話，佢聽長期停賽。新教練沙哲朗尼禮拜日首次喺意甲領軍大戰羅馬，諗住有個好開始，點知前線已經少咗個選擇，真係黑仔。
呢個禮拜六狼隊迎戰李斯特城嘅英超可能出現奇景，因為狼隊領隊戴夫鍾斯已經游說下個月中就四十歲嘅舒米高出山，而且有消息話可能成事㖭，如果掂嘅話，就可以見到呢個丹麥鋼門，可以同前曼聯隊友恩斯及艾雲再度一齊作戰，好似時光倒流，呢單新聞好有噱頭喎！
曼聯呢排同馬賽好似孖公仔咁，鬼死咁多新聞，繼巴夫斯加盟馬賽極可能無疾而終後，李奧費迪南因涉嫌服藥單嘢，搞到曼聯似乎想搵人頂佢個位，馬賽嘅比利時後衞尹貝頓就毛遂自薦，但係馬賽呢排防線唔多掂，近兩場加埋失七球，尹貝頓你自薦，怕唔怕面紅呀？