中信發展嘅壽臣山豪宅南源，用咗八百萬去裝修間示範屋，噚日邀請傳媒參觀。全屋用料貴之餘，裝飾擺設都做到一絲不苟，聽設計師如數家珍細說，就知有幾豪幾細心嘞。
全屋四十幾幅掛畫購自唔同畫廊，另又用咗六十幾種牆紙、二十幾種布藝。主人套房壁爐上個鐘（圖二），價值一萬五千蚊，套房浴室盞意大利手造玻璃燈（圖三），八千蚊，梳妝枱嗰盞係法國水晶燈，盛惠三千蚊，重有係全屋嘅羊毛地氈，用咗二十五萬。
一般擺喺示範單位嘅書都係得個殼，今次設計師就真金白銀用咗幾萬蚊去買新書，總共一千三百本，大部份係字典咁厚嘅英文專業用書。
八百萬裝修成本原來未算最貴，設計師話啱啱接到個南區豪宅工程，大約七千呎，業主預算開支一千五百萬，夠喺嗰區買間平平哋嘅屋住。
由新世界發展及亞細安資源合作，正起緊嘅香島道三十三號豪宅，揀咗1間屋做示範單位，可能間隔上有太大改動，之前向屋宇署申請改圖則，終於喺8月份批出，同時間重批埋售樓處個則。
聽新世界何太講，項目有十間四層高獨立屋。每間面積達六千呎，有私家電梯，兼五套房設計，另還有千七呎車房同二千呎花園。佢話𠵱家計劃明年2月現樓賣，呎價點都要萬八至兩萬至得喎，如果有投資者肯成個項目買都唔拘。
大中華地產發展潛力，被市場一致睇好，連外資測量師行第一太平戴維斯，都投上信心嘅一票。集團新一屆亞太區執行委員會啱啱成立，噚日喺英國母公司Savills集團行政總裁AubreyAdams帶領下會見傳媒，透露公司亞洲地區計劃未來五年，多聘一倍人手，即係千四人。
AubreyAdams話，公司喺中國市場發展嘅速度，遠超出其他地區，喺上海、北京、廣州，已請逾一千四百名員工，重有意喺次級城市開辦事處。
至於香港市場，公司董事總經理李偉文透露，今年到𠵱家生意額已達三十五億，相等於舊年全年收入，料全年可達四十億。李偉文認為，明年本港投資市場將達轉角位，甲級商廈售價微升，豪宅租金及售價皆向上，一線區舖位好似旺角、銅鑼灣等，售價就會升百分之五至十。
將軍澳居屋最近達成一宗第二市場超低價成交，只係三十八萬，呎價僅五百九十一蚊。
世紀21鄺志輝講，單位係浩明苑銀主盤，六百四十三方呎，喺一樓。買家係同區公屋客，原本只肯畀三十萬，前後傾咗三個禮拜，畀多八萬拍板。𠵱家屋苑放緊嘅二十幾樓同面積單位，第二市場最平都要七十萬。由於上述成交係個別例子，佢認為唔會對同區樓市有影響。
蘭西查番資料，毗鄰景林邨嘅單幢居屋浩明苑，十二年前五百八十三呎單位就係賣約三十萬，高峯期造成百幾萬㗎。
投資移民香港係最近嘅城中熱門話題，所以噚日中原同羅兵咸永道搞嘅研討會，特別多人捧場，重嚟咗一位菲律賓華僑，即係投資移民最重要嘅主角，佢係為了解投資移民香港嘅詳情而嚟。
呢位華僑吳小姐喺菲律賓從事地產業，打算介紹當地嘅朋友嚟香港買樓搞移民。佢話𠵱家已經有十幾名朋友有興趣，所以想同中原合作，幫佢哋搵樓，主要係物色豪宅。
不過，吳小姐就認為，𠵱家嘅資料唔足夠，細節未清楚，至於投資金額，覺得三百五十萬比較適合。
和黃地產深知都市人注重Keepfit，即日起買青衣藍澄灣，首十名買家可獲贈五千蚊博藝會現金券，可自由選擇唔同嘅健體課程，例如空手道、太極拳、體操、泰拳同埋現時流行嘅瑜伽。
發展商噚日喺售樓處，安排世界級選手示範泰拳同空手道，打泰拳嘅蔡東曉，今年曾打贏泰國第二名拳王，重攞到香港拳擊總會嘅金腰帶。示範空手道嘅陳枷囗，舊年攞過亞運會空手道銀牌。
上個月係代理行嘅豐收日子，生意額破晒紀錄，利嘉閣董事總經理何紹章話，公司嘅生意額達四千一百萬，所以決定派發五百蚊特別獎金，同埋一個月花紅畀約百五名後勤員工，即係今年最少有十四個月糧嘞。睇怕今個月條數都唔差得去邊。
中原上個月就派畀後勤員工五百蚊獎金，美聯就發最多一個月花紅。
蘭西
電郵地址：
