自7.1之後，香港已經進入「自由行治港」嘅「自動波狀態」，阿董呢塊人肉布景板，已經可有可無，實現咗特首泡沫化、空洞化、隱形化同埋嬉戲化嘅「後7.1政治生態四化」。
阿董早已不打自倒，啲挺董分子挺嚟挺去，只不過係一個五官貌似阿董嘅六十歲中國籍肥胖男子嘅一個激光雷射幻影。相反，胡主席嘅高大形象，君臨維港，籠罩特區，錦濤哥嘅音容，在京遙遙向香港發出特異功能，同香港吊住鹽水，呢輪，阿董就繼續面青唇白，而香港經濟就漸見恢復氣若游絲嘅呼吸。
民意調查結果，香港人對於胡溫兩總嘅滿意程度，都大幅飆升，對於中國政府嘅整體表現，亦跳躍咗百分之十四，胡溫音容治港，阿董嘅肉體雖然尚未落台，但靈魂已滅，精神已死。
咁就即是話，一個家庭，個家長已經冇晒權威，但係將個祖宗神主牌擺上張枱，啲仔女重聽吓話。香港特首呢個職位，已經可有可無，甚至索性永久撤銷咗特首呢個職位，喺政府總部掛起胡溫兩個嘅巨幅肖像，然後由政務司司長曾蔭權清晨返工之後，對住兩幅肖像三鞠躬之後，再主持行政會議，香港嘅樓股兩市，會升得重快。
胡哥哥繼續當紅，去到澳洲，榮獲喺坎培拉國會致辭嘅崇高待遇。喺民主國家嘅國會致辭，係要受到東道國嘅非常禮遇，例如美國前總統列根，去過倫敦下議院演講，而中國領袖去西方民主國家嘅議事堂演講，自從六十年前中華民國嘅蔣夫人宋美齡喺抗日戰爭期間去美國國會演講之後，就冇咁嘅歌仔唱，直到今時今日，胡錦濤成功打入澳洲國會，其劃時代意義，大過神舟五號升空。
澳洲政府呢一招，當然係有心誘惑胡哥哥，同佢扮自己友，希望可以用西方嘅民主嚟感化佢，令到佢返國之後做戈爾巴喬夫。呢個算盤未必打得響，不過，胡總已經威過鄧小平同江澤民，已經係事實。
胡溫十六大之後掌權，毋須「磨合」，已經有料到，但董班子撞板足足六年，今時今日都重話自己學緊嘢，在職培訓緊，胡溫風流，曾慶紅又大讚何厚鏵，香港人對胡溫嘅支持度大增，最冇癮嘅係邊個？
賴死唔走，未來四年，生不如死，重要慢慢受咁嘅煎熬。冇錯，好似佢自己話頭，辭職係最容易，捱落去，繼續受港人詛咒，繼續被高官公務員當佢冇到，繼續唾面自乾。
肯自願受咁嘅苦刑，先至需要更大嘅勇氣。一個人肯跪低，俾胡主席踩住佢背脊，升登民望高點，然後帶住背脊嘅黑鞋印，喺一片噓聲之中走入香港嘅歷史，咁高尚嘅情操，真係連八方都有少少眼濕濕。
傳真︰2623-9278
電郵︰