古天樂噚日以嘉賓身份出席一個由OSIM參與製造嘅全球首部按摩椅豪華轎車揭幕儀式，呢架車都幾巴閉，又長又有氣派都不特止，入面重有電視機、冰箱，最緊要係有一張高科技智能按摩椅，一邊按摩一邊聽音樂，當古仔坐入架車嗰陣，重即刻嘩嘩聲。
見到古仔咁樣，問佢有冇諗住買番架玩吓？點知佢好謙咁話：「我都想啊！不過要儲吓錢先。」聽到古仔咁講，在場嘅人都不期然起哄，有人忍唔住話：「架車都係二百六十八萬，你冇理由買唔起，講笑咩！」
古仔謙虛完一輪之後，終於好老實咁講：「唔係，我都想搵架咁嘅車送畀我爹哋，因為佢就嚟生日，如果架車畀我就太長，唔係好方便，畀我爹哋、媽咪坐就啱，佢哋又鍾意按摩。」架車咁長又咁大，咁咪要請人揸車，古仔話：「咁我咪辛苦啲，請個司機囉。」
林嘉欣個樣最近喺一本日本雜誌嘅分類廣告出現，原來佢無端端俾人做咗援交妹招牌。林嘉欣噚日喺台北出席新碟記者會時，佢對此竟然話：「嘩！真好！」後來知道自己被定嘅價格好低時，佢就改口：「這做法是不對的，請廠商接洽我的經紀人。」最後佢重自嘲：「挺好呀，代表我在日本有市場。」林嘉欣咁睇得開，唔知有客上門嘅時候，佢會唔會接受呢？
香港嘅《維港巨星匯》搞到滿城風雨，但台灣都要搞個巨星匯。音樂人張雨生當年一手捧紅張惠妹後，九七年撞車過身，早前張雨生爸爸整理佢嘅遺物時，發現有六十幾首未發表嘅作品，於是就由唱片公司召集，搵咗張惠妹、庾澄慶等三十四位歌手同組合演繹張雨生遺作，灌錄成大碟《雨生歡禧城》，噚日宣布下月十五號喺台北舉行一場演唱會，全部台灣歌手，唔請外援，呢啲叫自己人支持自己人，香港都應該咁啦。
名模陳嘉容噚日喺中環行騷時，話之前去咗泰國演出，但去到先知嗰場騷係演出畀出席APEC會議各國政要嘅太太睇，佢話：「所以場騷保安超級嚴密，我哋一班模特兒出入機場時，都要行秘密通道，嗰一刻突然覺得自己變咗個大人物㖭。」陳嘉容咁高，不嬲都係大人物啦！
翁虹八月嗰陣去咗西藏拍電視劇《康定情歌》，由於佢要喺川藏高原呢個海拔成四千二百米高嘅地方拍攝，佢講笑話換褲都差啲搞到缺氧。而當地人習慣一年只沖三次涼，但為咗攝製隊就起咗個流動廁所，而翁虹每次入去都要戴口罩同清新劑。海拔咁高重戴口罩，咁咪好危險！
