噚日喺北京見到麗新集團主席林百欣，以及佢大公子林建名同養子林建康等，但佢哋唔係去京港貿易洽談會，而係聽審。林伯話佢旗下鱷魚恤同法國Lacoste嘅鱷魚商標爭拗官司打到北京，噚日終於了斷，所以佢亦去法院聽判詞。
十年官司一朝了，林伯舒一口氣，心情輕鬆，講到名義上由細仔岳少搞、實質係泰國白龍王擔任監製嘅電影《無間道》，更讚不絕口，但話只睇咗第一集，第二集未得閒睇。林建名就答口話自己睇過，第二集重好過第一集，尤其係黃秋生嗰段（秋生好多段戲嘅噃，究竟邊段？林建名講嘢，就嚟有少少似阿董。）
講開電影，林伯話旗下廣州嘅收租樓盤東風廣場內有間戲院，租咗畀人經營，月租原先係九十萬（應該係人民幣），但間戲院嘅營業額得一百七十萬，尚未計同片商分帳。林伯見佢咁慘，就拍心口減佢十萬租，不過，大陸啲舖頭企業通常有幾年數簿，林伯，唔好太濫情呀。
傳真︰2623-9278
電郵︰