下個月推出新碟嘅BritneySpears，同麥當娜（Madonna）合作嘅新歌《MeAgainstTheMusic》MV，前晚終於喺美國首播，之前我羅拉睇咗少少片段覺得冇乜特別，睇完成個MV後，除咗意識有少少大膽外，啲畫面真係唔算太激，不過淨係Britney同娜姐合作呢個噱頭，都已經有大把fans排隊爭住睇。
MV一開始娜姐就成個老細咁，喺一間房入面用電視昅住Britney嘅一舉一動，之後兩個就隔住道牆感受對方嘅存在，娜姐重搞到喺地下「典」嚟「典」去，跟住Britney開始同娜姐追追逐逐，最後Britney見到娜姐之後，想同佢嚟多次濕吻，點知原來娜姐只係幻覺，一下子就消失咗。
另外，Britney喺新大碟入面，特別創作咗一首叫《Everytime》嘅新歌，據講佢想藉此向JustinTimberlake道歉，因為成首歌都係「請你原諒我?我的弱點令你痛楚?這首歌是我的歉疚」嘅歌詞，擺到明想同舊愛重修舊好，要佢返嚟自己身邊。
而娜姐喺舊年英國最高收入音樂人排行榜入面，以三千六百萬英鎊（約四億六千九百萬港元）位居榜首，保羅麥卡尼（PaulMcCartney）同米積加（MickJagger）分列二、三位，RobbieWilliams就排第九。