演藝界八十人上京團，傾「屍爬」開放市場放水搵食，今日成行，肯定冇得見胡錦濤，因為胡哥哥重喺亞太國家外訪，不過，斷估唔會連曾慶紅都冇得見，因為連民建聯曾鈺成、港進聯劉漢銓都有得見曾副主，唔通成班演藝人嘅演技，會水得過一啲變面轉表情快過鬼嘅香港政客？
7.1遊行之後，有冇演藝界嘅黑名單？問上京團團長立法會議員馬逢國，就梗係話冇，有人重大大聲講，連7.1遊行嘅演藝界中堅、大導演杜琪峯，今次都榮獲邀請，點會有黑名單呢？
不過，被歸類為「著名導演」而獲得「提名」嘅，就得八個咁少，去過7.1遊行嘅大導演如徐克、陳可辛、陳嘉上、許鞍華、張堅庭、張同祖等，全部冇份。講到著名，徐克喺荷李活拍過戲，陳可辛嘅《三更》同埋《見鬼》，更賺成幾千萬，重賣埋荷李活版權，陳嘉上夥拍成龍，拍埋西片㖭，呢啲都唔係著名導演，唔通係片場咖哩啡？
唔怪得噚晚影藝圈中人，由酒家、K場至夜總會，手機響個不停，人人互相打聽，阿邊個有冇得去，又或者自己榜上點解冇名；如果自己冇份，點解阿邊個又有，心情集歡喜、失落、憤怒、嫉妒、恐懼於一爐，如果有個導演，將成班演藝界人士嘅反應表情拍低，剪輯為一套五分鐘短片，肯定好睇過7.1大遊行嗰一套。
有啲圈中人向八方呼冤：7.1嗰一日，人人都遊行嘅喇，自己當日只不過落街買個麵包，俾啲人潮湧吓湧吓，咁就俾娛記影咗相，搞到留低犯罪紀錄，呢次上京，自己冇份，好唔開心，覺得胡溫又話開放親民，始終係講一套做一套。
又有啲圈中人話：呢一行個個面和心不和，人人都有仇家，最開心就係上京團自己榜上有名，而自己最憎嘅嗰一兩個就冇，睇見張名單，開心到幾乎想飛，重想打個匿名電話畀對方：「上京冇你份呀？抵你死！」然後收線㖭。
唉，啲影藝人又使乜咁睇唔開吖。政治同拍戲，有兩大共通點：第一就係講演技，第二，就係講現實。台灣紅歌星張惠妹，喺陳水扁就職禮唱歌表演，跟住夠俾中國話封殺喇，唔夠半年，咪又照樣去番中國登台？
正所謂：無慾則剛，堂堂跨國企業嘅麥當勞，會唔會因為遭到紐約唐人街飛龍幫封殺，唔准佢開舖，就會鬼揸咁嘈？若果個市場係全人類，個舞台喺全世界，有冇得上京，邊個會理？見到張名單，八方更加敬佩荷李活億萬金元香港大導演吳宇森、荷李活億萬票房華裔大導演李安，佢兩個喺國際嘅影壇，大名金光四射，今次上京團，佢兩個毋須榜上有名。下屆奧斯卡同康城影展，唔畀帖吳宇森或者李安，人哋先至會傷心啫，係嘩？
傳真︰2623-9278
電郵︰