港股噚日臨尾腳軟，恒指收報12238，跌12點。原來市場又傳出有多隻藍籌配股抽水，其中傳配股包括中銀香港（2388）、新地（016）及九倉（004），收市後再傳出信和置業（083）亦想配股。
不過，新地表示現時息口低，要集資都寧願發債唔批股。信置雖已否認配股，但市場普遍認為佢配股機會高，因為公司負債率唔低，發債成本會較高。
據聞信置同投資銀行傾配股傾咗一段時間，主要配股價重未傾得掂。信置噚日一度大升5.3%至4.475元，收報4.425元，仍升4.1%。
新財爺噚日發表的財政理念無乜新意，主要都係講推遲兩年滅赤目標，暫時不開徵銷售稅。事實上，財政司並非魔術師，只要政府唔再使埋啲無謂錢，例如巨星滙呢一類活動，各界應該忍受一吓削減資源、福利及服務等措施。
光大控股（165）勁升7.2%，收4.45元。有消息話，旗下光大銀行盈利表現不俗。值得注意係光控手頭現金有4.3億元，加上好大機會接受富邦收購手上持有的20%港基（636）股權，如果事成，可套現逾8億元。此外手頭重有4500萬股中移動（941），市值約10.5億元，即係話光控隨時可動用超過20億元進行收購，咁啱內地傳出中央有意讓外資增持內地商業銀行股權嘅上限，市場自然憧憬光控會進一步增持光銀。
國潤汽車（175）前日見完分析員後，噚日正式開車，大升8.4%，收報0.90元，成交可以炒到超過1億銀，睇嚟炒家實力唔可以低估。
阿虎