指數變化輕微，大市炒個別，啲錢流向電訊股，電盈（008）跑贏同類股，收5.95元，升15仙，幅度好似唔係好大，但啲Call輪有槓桿效應，升幅唔係咁計。
先一排經常提及嘅電盈Call輪9791，收1.62元，升12%，溢價縮到2.9%，槓桿率3.7倍，急升後爆炸力轉弱。9766升28%，收73仙，呢件對正股反應比較敏感，下月初夠鐘，溢價0.5%，槓桿率8.2倍。炒呢件睇住日曆。
中移動（941）收23.35元，爬高5仙。中移動係大價股，變化慢啲，但期指下星期結算，佢夠重磅，有可能用嚟做挾淡倉嘅工具，可以諗吓Call輪搵食。想搏殺，揀9656，12月中到期，輪價16.8仙，槓桿率13.9倍相當爆炸，但要畀5.2%唔算細嘅溢價。因住時日無多，正股如果牛皮，揸9656會蝕溢價。想炒得安心，始終係要揀9861，壽命同9656差唔多，輪價54仙，槓桿率4.3倍，勝在溢價得0.2%，唔怕輸溢價。
地產股中，新地（016）升25仙，恒地（012）升50仙，長實（001）則失色得多，早段做66.50元，有50仙進帳，但尾市俾人掟落64.25元，唔見1.75元。下一回合，長實有機上番去，個市喺高位反覆，向下移動嘅股份，到咁上下又會向上移。Call輪9065昨散10%，係時候趁低吸納，明年3月到期，輪價88仙，溢價7.1%，槓桿率7.3倍。
章盛