自由黨改嘜頭，實行商標自我大赤化，向全世界最大嘅政治組織中國共產黨獻上赤膽忠心，民主黨嘅華叔見到都唔知好嬲定好笑。有日喺立法會議員休息室，大家講起自由黨個新黨徽，華叔忽然話佢一直覺得田少個黨係富貴黨，舊黨徽好似一支高球棒正在打golf，好啱feel；而新黨徽就好似打緊桌球，個白波碌到去枱邊，差啲先入到袋。
華叔形容得咁繪影繪聲，班尊貴嘅議員第一時間去攞自由黨嘅黨徽睇吓，又幾似噃。
講開改黨徽，原來白鴿黨舊年都靜雞雞同隻肥鴿做咗減肥手術，重將隻鴿個頭改向前衝，好似就快要破圈而出咁樣。點解咁改呢，李永達話佢哋一直覺得以前隻鴿太死板，肥嘟嘟，好似飛唔起咁，於是改得佢fit啲，有動感啲，而且方向亦好清楚，由左向右飛，係咪好睇啲呢？
人怕出名豬怕肥，白鴿肥時，亦即離劏屠之日不遠，都要瘦吓身，韜光養晦好啲。
傳真︰2623-9278
電郵︰