香港人對日本菜有一份莫名的喜愛，單看坊間日本食肆數目之多，已可見其受歡迎程度。原因大概跟日本食物賣相精緻，而且份量夠的骰，感覺上食幾多都唔會肥有關。好似今次示範用海鮮做日式煮物的梁啟超師傅，入行正是受日本菜色誘所致，「單說擺設，日本菜已經是一種藝術。」飲食講究色、香、味，色要排第一，不無道理。
記者：羅惠芬 攝影：梁細權
示範：帝苑酒店稻菊餐廳梁啟超師傅
外表後生的梁師傅，其實已經有10年入廚經驗。他說一開始已經被日本菜精緻的賣相所吸引，學師後更積極，公餘專登四出搜購日本食品書籍，研究日本食物的擺設。「日菜的材料要新鮮，價錢一般唔平，上碟後賣相要靚，才會顯得矜貴。」師傅重話，每次諗到一個新造型，都可以開心成日。
自言最鍾意試日本菜的梁師傅，每次出街食飯，都愛試日本餐廳，試食完就會返屋企試做，最鍾意在傳統中加新意的風格。「學過做壽司、煮物等，最唔鍾意做鐵板，覺得佢變化不大。」現時主攻壽司的他，話煮菜最重要唔好令自己悶親，「日本菜我就日日煮同食，所以放工後我唔會下廚，又唔畀老婆弄日式菜，咁至Keep到我對日式食物的新鮮感。」
黃鯛其實是馬頭魚，共有赤、黃和白色三種，當中以黃色馬頭最當造，現時一般魚檔都好容易搵到。要煮好這個菜，最重要是魚的鱗片要細且薄，炸出來才可口鬆脆，所以揀魚身較小的有着數。
用咩料：
馬頭魚1條約60克
汁料：
木魚水6湯匙、日本豉油2茶匙、葛粉3湯匙、清酒2湯匙、胡椒粉和鹽各適量
小貼士：
1.魚肉切片時，要留意刀口要向下用力，否則向上扯會將魚鱗扯甩。
2.木魚水是日本一種調味料，可於大型超市搵到。葛粉則可到一雜貨舖搵到。
伊勢海老其實是日本人對龍蝦的叫法，梁師傅話買龍蝦，要先睇蝦身色澤。以他今次選用的本地花龍為例，產自水清沙幼的澳洲珊瑚區，外殼的藍色愈清淨愈好，加以葛粉同煮，可以將龍蝦的鮮和甜味帶出。「開龍蝦最緊要小心，任何時候都要用毛巾包手，以免刺傷。」
用咩料：
龍蝦1隻（約1斤半重）、葛粉3湯匙、冬菇和乾松茸各100克、大葱絲和蘿蔔茸各適量
汁料：
日本豉油2湯匙、木魚水約10湯匙、日本清酒1湯匙
小貼士：
開龍蝦時，留意牠只得一個縛口位，就只要沿住頭殼邊用刀一「𠝹」，肉即應手而得。
試食報告
