近排潮流話題圍繞太空，連港府都話要請中國太空人楊利偉嚟香港，所以地產代理搞記者會，都特別準備啲同太空有關嘅道具。噚日港置喺麗港城嘅宇晴軒跨區服務中心開幕，就用火箭形嘅宣傳牌，寓意銷情可以一飛沖天。
為求應景，港置特別喺美國運咗批太空雪糕返嚟，包裝說明製作過程，首先喺零下40度冷藏，再真空處理，令雪糕變成乾身。長實郭子威即場試食後，覺得味道比較甜。港置重話，呢隻太空雪糕，香港冇得賣。
蘭西都試食過，雪糕相當輕身，外形有啲似發泡膠，有朱古力、雲呢嗱同士多啤梨三種味道，食落既唔凍又乾身，雖然真係入口即溶，但係感覺就怪怪哋，唔知雪凍咗味道會唔會好啲呢？蘭西建議最好搭個太空倉布景，咁至夠貼切。唔知呢隻雪糕楊利偉食過未呢？
中山星晨花園發展商馬聯集團，最近引入一項生態技術。聽發展商代表蔡玉彬講，佢哋買咗兩噸半蚯蚓，專食屋苑產生嘅有機垃圾，好似雜草同菜渣咁。而蚯蚓嘅排泄物，就成為植物最好嘅無毒無臭肥料，取代人工化肥，年終慳唔少之餘，又減少污染，一舉兩得。
另外，發展商重諗住遲吓推出「買樓送幅地」嘅促銷策略，塊地畀買家栽花種樹，耕田都得喎。已經預留成六十畝地送畀買家。
大角嘴洋松街八十一至八十三號美斯工商中心，全幢剛以一千二百五十萬元易手，中原黃啟成話，大廈樓高十一層，總樓面逾三萬一千六百方呎，每呎三百九十六蚊。
物業𠵱家出租率僅得三成，租金回報已達八厘八，若全幢租出，估計可達十九厘。雖然有咁高租金回報，但係物業位處九龍市區，又已規劃作住宅戌類，具重建價值。唔知買家會繼續收租，定係重建提升價值？
大角嘴奧運站一帶近幾年不斷起樓，令到嗰度首個住宅項目維港灣，望向汲水門嘅西邊海景逐漸收窄，前面重有恒隆地產同信和置業兩個樓盤起緊，只剩番中間一幅重係空置，業主心都噏埋。
最近出現有心人話，應維港灣業主嘅訴求，認為嗰度樓太多嘞，排到密質質，冇乜休憩地方同空間，而且唔想連最後嘅海景都冇埋，故向城規會申請，將嗰幅重未賣嘅住宅地，改劃做休憩用地。聽講年底會審議。
蘭西認為，維港灣一帶啲樓真係密咗啲，但政府一早規劃好附近有不少休憩用地，而且嗰幅地皮現市值成十億，𠵱家政府咁「莫財」，會唔會捨得送成十億畀維港灣業主呢？
蘭西
電郵地址：
