張栢芝前晚同細佬、兩個男性朋友，喺中環安蘭街出現，當時佢準備攞車，揸嘅係黑色MiniCooper。平日佢最鍾意喺車入面放公仔，車頭放一個水晶結他，但前晚所見，只有三隻男裝adidas波鞋放咗喺車尾做擺設，唔見咗水晶結他，唔知係咪代表佢同謝霆鋒情已逝？嗰三隻波鞋，又唔知係咪陳小春送畀佢嘅愛的紀念呢？
此外，栢芝日前接受鳳凰衛視《魯豫有約》訪問時，話自己當年同陳曉東拍拖，錯在公開而令大家有壓力，否則佢𠵱家都可能重同東東一齊喎。講到霆鋒，栢芝就話唔會承認同霆鋒拍過拖，佢話𠵱家心裏面有個鍾意嘅人，但一定唔係霆鋒，佢重承認自己唔係玉女，為咗保護細佬打交都得，佢亦承認自己有食煙同飲酒。
李克勤前晚喺新城娛樂台接受《今夜陽光燦爛》直播訪問時，對於郭富城近日獲選十大傑出青年後，乘機翻張學友、劉德華同黎明嘅負面新聞舊帳，問克勤有冇覺得城城口氣好大？佢話：「呢啲咁深嘅題目我唔識答。」佢重以陳小春為例，話小春平日好搞笑，所以唔會將佢嘅說話當真。
咁講法，好明顯克勤係撐城城啦。
Shine噚日去港台做節目，佢哋兩個都有份喺《維港巨星匯》做表演嘉賓，講到呢個騷搞到一鑊泡，有唔少是非，問Shine重會唔會做呢個騷，佢哋話：「咁接咗我哋就一定會做，呢個係一個好難得嘅機會，就算得一個觀眾我哋都會照做。」相信Shine嘅fans都唔只一個人嘅，何況可能會派飛㖭！
方力申就嚟出新碟，打咗好多友情牌，佢今次特登要以man一啲嘅造型示人，搵咗唱片監製雷頌德做形象顧問。講時裝，雷頌德都算係藝人當中有品味嘅，佢建議方力申着西裝同冷衫，冬天look嘅方力申睇嚟真係成個模特兒咁款，方力申好鍾意，重即刻買多幾套西裝㖭。不過佢唔似細路同運動員，竟然變咗做model，唔知咁改變形象算唔算成功呢？
