細路豪在沙田××圍一間名校返學，中午食飯最鍾意周圍去，弊在佢阿哥喺禾輋方面返學，商場有快餐店，附近有街市，十分方便，××圍就冇咁多花款，於是最經常去嘅就係附近間便利店。
呢日成班人食飯，細路豪食得高興之餘，對班大人講：「你哋猛講自由行，遊客多，你哋知唔知道乜嘢叫做自由斟呢？」左丁山同幾位成年人都唔知，於是叫佢解釋。細路豪好得意咁話：「便利店買汽水吖嘛，我哋四蚊就可以買一個大大杯，行埋去斟可樂，任斟唔嬲。啲同學要攞便宜，飲一啖，斟一斟，係咁飲，飲到肚都大晒。個杯好大㗎，有六七吋高，有啲同學就鍾意斟一啲可樂、一啲發達橙汁、一啲雪碧，撈埋一齊。」細路豪阿媽聽完，立即喝住：「你唔好咁樣斟汽水，容乜易飲壞肚？」
細路豪眼眨眨：「間便利店好多迹㗎，汽水機嗰度重有好多烏蠅㖭！」唉吔，做家長嘅，聽到暈低，細路豪個媽咪講：「唔怪得你成日返嚟講有同學肚痛、肚屙，你以後一定唔准自由斟！」
好多便利店都乾淨企理嘅，細路豪講到××圍嗰間咁唔衞生，實屬罕見。其實便利店係特許經營，總公司應該有人做督察吖，搞自由斟似乎係優惠顧客，但實在係害學生，唔怪得年紀輕輕，就患糖尿病嘅個案日益增加也。