全城車迷熱切期待嘅第37屆東京車展，雖然正式展期係由後日（10月25日）至11月5日，但一眾汽車傳媒卻可率先入場參觀，並為車迷報道車展會場嘅盛況；當中令筆者駐足細看嘅，係一部經過強化改裝嘅大發Copen開篷小跑車，而豐田CrownConcept亦見有一份吸引力。有興趣嘅車迷，不妨一齊嚟睇睇。
記者：陳偉林 鳴謝：皇冠汽車有限公司 （部份圖片由大會提供）
今趟廠方跟有名改裝車商嘅Sard合作，炮製出呢部辣味十足嘅CopenSardSpecial開篷小跑車，內裏重搭載有一台1.3公升直4偈呢！
至於剛啱響日本本土市場推出嘅本田Odyssey，亦於今屆車展會場中亮相；新車造型屬全新配搭，相比起昔日成熟穩重嘅形象來得截然不同，就連車廂內部亦經過重新設計，予人耳目一新之感呢！至於機械配搭方面，新車則以一台2.4公升直4DOHCi-VTEC引擎作主打，馬力輸出由160匹至200匹，絕能迎合不同用家嘅需要。
本田Fit（即港版Jazz）自推出以來，一直深受車迷歡迎；然而，響今屆車展會場內，有關方面展出咗一部全新嘅FitRacingConcept，此車不但裝有全車包圍及跑車貼紙配搭，望落極具吸引力之餘，引擎輸出亦見出色，相信此車日後若能正式落場的話，定能惹來不少車迷注視㗎！
預期快將推出新一代嘅豐田頂級豪華轎車，造型倍見秀麗吸引，又見氣派出眾；此外，佢又以一台3.0公升V6引擎作動力核心，車廂設備配搭亦見先進豪邁。
屬頂級Facelifted新版嘅萬事得Roadster（即MX-5），有全新包圍及頭燈組合外，重用上一台1.8公升直4Turbo新偈配搭，除咗底盤有所強化外，並用上四輪205/45R17胎軨組合，可謂辣味十足。
至於日產方面，除展出一系列極具吸引力嘅概念車之餘，新近在日本本土市場推出嘅頂級豪華轎車President，亦有於車展場內現身。外形看來氣派十足，而車廂內嘅設備亦屬頂級配備，絕能讓每位座上客有極舒適嘅乘坐享受；然而，一台4.5公升V8偈更可輸出高達280匹馬力，用以驅動此車可謂綽綽有餘。
備受年輕車迷追捧，並可接載七名乘客嘅全新日產Cube3，廠方於場內展出咗全新Cube3+Conran&Partners新車；全車以黑色為主要色調，望落夠Cool之餘，再襯以鮮紅色座艙及略作改動嘅車廂布局，真係好正㗎！
