呢排令到波友失望嘅拜仁，前晚喺歐冠盃分組賽作客又贏唔到波，俾里昂迫和。而且完場前重差啲俾舊將艾巴省入，如果輸波，會長碧根鮑華更要輸錢。
點解？原來艾巴為咗決心射破拜仁大門，賽前表示有意同碧根鮑華打賭一萬歐元（約九萬港元），希望贏牙骱之餘，亦將呢一萬歐元捐畀巴西孤兒基金，做吓善事。我求大俠睇番精華片段，艾巴門前幾碼「半車身」抽射真係入得，但咁都俾表現神勇嘅簡尼單手救出，都算冇運。雖然碧根鮑華最後都肯慷慨解囊，但如省入呢粒波，艾巴幫球隊贏波之餘，重贏埋牙骱，肯定一吐烏氣！
唔知係咪蛇無頭不行，國際米蘭作客吞火車頭三蛋，輸波輸面。其實場波戰況未至於一面倒，但國米硬係送唔到個波入網，好似韋利頂中楣嗰球最黑仔。相信最難受可能係列高巴，佢重獲正選後，國米連續兩場都戰績唔好，話關晒佢事就未必係，但腳頭就認真麻麻。
柏林哈化決定暫時唔解僱教練史堤芬斯，原來令佢保得住飯碗嘅唔係佢自己，而係班球員。據講柏林哈化球會高層決定將個波交畀球員表決，應唔應該留用史堤芬斯。結果球員一致支持教練留任，令佢不致「冇得留低」。有班咁撐佢嘅球員，史堤芬斯真係要發憤啦。
南韓繼響首場亞洲盃外圍賽輸畀越南○比一後，前日又輸畀阿曼一比三，假如禮拜五贏唔到尼泊爾，就連出線權都冇埋。雖則話佢哋派奧運隊去踢，但堂堂亞洲強國連輸兩場，教練高爾奧自然受炮轟。𠵱家佢好似被記咗個大過咁，除非未來領軍成績有突破，否則唔慌教得長。
馬會足智彩博彩項目少，令波友想贏大錢嘅機會唔多。不過前日歐冠盃同埋英甲就有幾場冷門戰果，例如火車頭W（約四倍）、溫布頓W（約十倍）、華素爾W（約五倍半），揀中嚟三串四有成三百三十倍，原來足智彩都可以刀仔鋸大樹嘅……當然，係咪易捉就睇你眼光喇。