早前經紀陳提過，控股權易手一年左右嘅明倫集團（346），因為轉型做天然氣業務，有機會批股集資。不過，當時明倫未有異動，直至事隔一個月後，明倫才在上周五批股。
明倫上周五以先舊後新方式配售1.7億股新股，每股作價0.21元，集資淨額3400萬元。
經紀陳話，今次明倫批股份，聽聞有大隻佬要咗唔少貨，但亦有部份流入友好炒家手上。上周五，明倫收市價0.25元，高出配股價唔少，所以踏入今個星期，見到有獲利沽盤出現，令股價受壓，但噚日股價已見回穩，升0.87%，收0.232元，成交金額505萬元。
當呢類獲利盤沽得七七八八後，明倫估計會正式開車，現價同批股價唔差得太多，可以小注短炒一轉。
另外，呢期盛行嘅大陸汽車股繼續發威，噚日靚女經紀推介嘅元征科技（8196）大升8.75%，收2.175元，小初成功食胡。靚女經紀再叫留意國潤控股（175），雖然隻股噚日升咗8.4%，收0.90元，但佢話高處未算高。
慕容小初