《未來戰士3》DVD版快將推出，好似慶祝大隻佬阿諾攞到個州長返嚟做咁。作為經典之作最終回，套戲上畫時的確有唔少人覺得失望，不過今次睇番年代提供嘅試版DVD，又唔係覺得咁差喎。
記者：徐影龍
重溫DVD版，可能未存任何厚望，反而覺得《未來戰士3》又並非太差。劇情預咗冇驚喜，主力集中睇套戲嘅打鬥場面；雖然戲內酒吧搵衫、重型車惡鬥等抄番上集舊橋，不過拍出嚟都算幾有氣勢，帶出一種緊張刺激感，而且碟內收錄埋較靚聲嘅dts格式，趁住屋企冇人時最啱要嚟「炸機」。
例牌菜BounsDisc收錄內容都幾豐富，除咗預告片、製作特輯外，重有州長阿諾現身說法大講感受，連導演、女主角等都出嚟講吓拍攝期間嘅苦與樂，最正就係有晒中文字幕，香港人自然睇得明。
發行：年代電影
推出日期：10月28日
