維港水魚大雜匯，日日新鮮鑊鑊甘，搞到要通街派免費飛，坐喺白加道官邸嘅煲呔曾，忍無可忍，繼上周發email呼籲公務員去捧場，噚日朝終於叫晒班關事嘅阿頭去問個究竟。單嘢咁大，尤其係已有美商會嘅外國勢力插手，啲土共已經忍住道火就快爆，煲呔唔及早出手，就會好政治化。
唔知係咪心知今次大鑊，下晝佢老哥喺立法會表現特別瞓身，民主派議員質問曾司長，點解老董見各黨派議員厚此薄彼、聽咗又冇件事，佢竟然買一送一，獻埋老婆曾太出嚟為老董解畫！
煲呔話佢老婆每日都叫佢做呢樣做嗰樣，但係佢好多時都未必做得晒，之不過，唔係佢唔尊敬老婆，亦唔係唔恩愛，就好似董生咁，唔係冇聽或者唔尊敬啲議員，只係未必跟晒啲議員做啫。連老婆都擺埋上枱，睇嚟煲呔都聞到陣隨咯。
傳真︰2623-9278
電郵︰