做咗三年幾社署署長嘅林鄭月娥，今個月底就會正式卸任，接替曾俊華做房屋及規劃地政局常任秘書長。唔知係唔係就嚟轉職，林太近日心情特別靚，好似開籠雀咁，噚日重喺電台公開咗好多鮮為人知嘅家事。
林太應港台節目《時事沙龍》邀請，同五個小三學生「真情對話」。有學生問林太平時喺屋企會做啲乜，身為兩子之母嘅林太就話，每日返屋企之後都會煮飯、洗碗，朝早重會整早餐畀兩個仔食。林太重話，平時好鍾意睇烹飪書，其中《香港十大私房菜》就最得林太歡心，佢話貪本書介紹好多好嘢食。難得佢身為高官，完全唔介意私房菜等同無牌食肆，重幫手推銷，林太真係好親民。
八方覺得林太係一個入得廚房、坐得私房、出得廳堂嘅職業女性，希望佢做秘書長之後，中環填海爭拗可以快啲解決，等林太唔使咁忙，可以日日返屋企煮飯畀兩個仔食。
（圖）林鄭月娥同班小三學生真情對話，重透露咗好多家事畀佢哋知㖭。
傳真︰2623-9278
電郵︰