個市繼續升，恒指再有102點進帳，滙豐（005）接力，做咗帶動指數大藍籌，收113元，漲1.50元。兩隻推介嘅滙豐Call輪9845與9908，升幅約12%，輪到另1隻滙豐Call輪9923抵買，呢件明年4月夠鐘，輪價1.26元，單日只升6.8%，溢價1.4%，槓桿率9.0倍。
滙豐昨日升幅1.3%，仍然細過中銀（2388）2.2%。滙豐喺中銀帶動下，繼續向上。隔晚歐洲銀行股升到七彩，唔排除歐洲芬越洋買滙豐，滙豐見百二蚊，可能係一兩個禮拜內嘅事。揸咗滙豐Call輪者，坐定定等，利潤愈滾愈大。
今日推介九倉Call輪。九倉（004）呢排霎吓霎吓，冇點跟大市，昨日醒番少少，收20.85元，升20仙，距離月初22.10元重有1.25元。大藍籌有如股仔，耐唔中失驚無神會有傑作，芬佬大把錢也，九倉隨時彈升畀過你睇，買定九倉Call輪可也，對象得隻9086，收45仙，冇升跌，1年後到期，6.4%溢價唔貴。
再推介隻抵玩Call輪畀大家參考。就係華創Call輪9868。華創（291）近排一浪高過一浪，PE又低過好多紅籌，昨日調整20仙，值得趁低買入Call輪9868，隻輪重有兩個月壽命，輪價2元，溢價得0.9%，槓桿率4.6倍。正股見10蚊齊頭，唔係難事，隻輪值2.70元。
章盛