日本新潮社近年推出一個「月刊」乜乜系列寫真集，每個月搵一個女星掛帥，好似之前推出過嘅《月刊MEGUMI》、《月刊友坂理惠》、《月刊安達祐實》都有好大回響，一嚟啲寫真拍得夠激，二嚟價錢比起一般寫真集實惠，所以一路都好受寫真迷歡迎。
最近推出嘅《月刊奧菜惠special》，比起以往嘅《月刊》系列真係有份量好多，頁數又比一般多，所以價錢就貴啲，要成一百七十幾蚊，無他嘅，話晒有奧菜惠拍性感照，加上係由攝影大師荒木經惟操刀，所以係份量勁啲㗎啦！
之前喺日本雜誌《Flash》同《WeeklyPlayboy》，已經率先有一兩張奧菜惠濕身look曝光，真係好吸引，正當我大口羅拉滿心期待咁打開本寫真之際，發覺本書好玩嘢，尤其係佢嘅排版，唔似一般寫真集咁一頁一幅靚相，反而將啲靚相排到又大又細，甚至搞到支離破碎，都玩得幾癲㗎！
而奧菜惠本來好性感嘅寫真，一時又黑白，一時又得紅、黑雙色，又一時搞到鬆郁幪，又或者細細張，真係睇到人到喉唔到肺，或者荒木經惟覺得咁樣至夠藝術啩！