近期當炒概念股，除咗大陸汽車股之外，經紀黃話大陸保險股亦係絕對不能忽視，因為兩隻巨型新股人民財產保險同埋中國人壽保險就快出籠，所以不能忽視家陣唯一嘅大陸保險股中保國際（966）。
中保國際噚日升3.24%，收4.78元，創下52周新高，值得留意係621萬股成交中，出現一手大成交246萬股，造價每股4.60。
經紀黃話，相信嗰手大成交係有芬佬買貨。最近隻股不停見有美資大行密密掛牌買入，可能因為人保同埋中國人壽嘅保薦人都係美資行，由於佢哋落力推介，所以引起埋芬佬注意中保國際。
經紀黃話，雖然中保國際與兩個大隻佬未能相提並論，但作為看風駛𢃇嘅炒家，應該要緊貼潮流。
另外，早排靚女經紀強力推介嘅元征科技（8196），果真完成配股，雖然配售價定於1.50元，與市價有頗大折讓，但因為批出嘅係新股，投資者嘅股票一日未收到，股價都會守得住，所以噚日又升6.95%，收2元。
慕容小初