選美出身嘅乖乖女，唔做戲就真係嘥晒，好彩電視台都識知人善任，力捧佢做姐仔，不過昭哥就認為鏡頭後嘅佢比鏡頭前更識做戲，淨係佢扮可憐呢招絕學，已經夠資格攞女主角獎啦。
乖乖女成日將自己扮成孤獨精，見親記者就頭耷耷眼濕濕，博同情。早排佢拍劇，成日私底下同啲記者呻，話俾同劇啲姐仔蝦，其實事實就啱啱相反，姐仔俾佢蝦至真。
昭哥聽啲工作人員講，話套劇初初開工嘅時候，姐仔對乖乖女唔知幾好，買親嘢食都預埋佢嗰份，但乖乖女知見報率實輸畀姐仔，就先下手為強，成日含住泡眼淚，話自己俾人杯葛，但係轉過頭就笑晒口咁對住姐仔，以超大聲同姐仔講早晨，驚死其他人聽唔到咁，咁佢就可以大條道理同人講，佢對人係好有禮貌㗎！
呢排乖乖女拍另一套劇，又用番同一招，對同劇嘅老牌小生扮可憐，老牌小生啱啱回巢，第一次同佢合作就俾佢瞞騙，不過呢行好細嘅，好快老牌小生就知乖乖女想借樹遮蔭，所以家陣見到乖乖女埋身，都彈開九丈遠。
胡杏兒噚日喺將軍澳電影廣播城出現，記者問吓佢有關喺劇集《彩虹橋》度搶李彩樺（阿Rain）戲份嘅報道，杏兒覺得今次事件好無奈，佢話：「冇發生過，點講都冇用，清者自清。」問佢有冇覺得自己嘅戲份多咗，佢就話：「我冇理由計自己有幾多組戲，我同阿Rain冇嘢，我哋都有同場嘅戲，大家合作愉快。」
早排台灣有周刊登咗對劉嘉玲不利嘅報道，身為當事人嘅嘉玲已經立即作出澄清，嗰份雜誌噚日發咗聲明，內容話因為報道對劉嘉玲造成名譽上嘅損失，佢哋感到好抱歉。
另外，劉嘉玲噚日去咗台北，準備聽日出席瑞士浪琴表嘅宣傳。
早前有報道話陳慧嫻耳水唔平衡，重講到佢鬼咁嚴重，話要封咪喎，咁事實就梗係冇咁大件事啦！噚日慧嫻接受商台訪問，就話：「我冇乜事，不過耳水唔平衡耐唔耐會發作。」問慧嫻如果要長休，會唔會考慮結婚，佢就話：「都冇人同我求婚！」慧嫻隔空發功，佢個醫生男友應該識做，開口求婚啦！
陳鍵鋒近日拍無綫新劇《我師父係黃飛鴻》，佢重要剃頭演出，最初陳鍵鋒都好擔心剃光頭會冇晒fans，但係好彩佢睇到自己剃咗頭個樣都唔差，佢先放下心頭大石。陳鍵鋒話好希望剃完頭可以好似前輩劉德華同梁朝偉咁紅起上嚟。不過近排就嚟入冬，陳鍵鋒睇怕未紅起上嚟，就要先試凍起上嚟嘅滋味！
林嘉欣呢輪除咗忙宣傳電影《戀之風景》，佢又要忙為國語新碟造勢。佢第一首主打歌《我不怕》已經拍完MV，喺MV入面佢同男主角玩得太癲，完全控制唔到，搞到成日要NG。
另外，林嘉欣喺MV度因為要應付高難度動作，所以唔小心扭傷條頸，佢今次為國語碟咁搏命，如果隻碟唔掂，嘉欣就肯定會好谷氣！
