中國國家主席胡錦濤繼續喺曼谷推行「微笑外交」、「人性公關」、「魅力震盪」，成個場佢一個威晒，莫講阿董根本行埋一邊，連布殊都俾佢搶咗唔少風頭。
胡錦濤破天荒第一鑊，喺曼谷舉行「毋須睇稿即興答問記者會」，並講到明，乜嘢問題都會答，共黨嘅話事人充滿自信，作風會學足肥彭（雖然都未達同一班），簡直令人要岳高頭望吓、睇吓太陽今日係咪由西方升起？
錦濤哥話，上任咁耐，最大嘅挑戰係沙士，見到咁多同胞受苦受難，佢好焦慮，又話好在大家果斷、團結、科學地去抗擊沙士，終於取得階段性勝利。佢話喺聽見世衞組織解除北京疫區嘅標籤時鬼咁開心。吃一塹，長一智，一定會克服困難。
同一句「吃一塹，長一智」，點解經胡錦濤把口講，就順耳，由阿董講出嚟（經一事，長一智），就變咗笑話？好簡單，因為小胡咁講，係指全國宏觀嘅角度，唔係用嚟形容某一個想卸膊嘅官員，佢邊有阿董咁蠢，話衞生部長張文康唔使辭職，因為相信佢「吃一塹，長一智」，𠵱家已經累積咗經驗？
估唔到一國兩制，執行六年，中國領袖講嘢，愈嚟愈似番個人講嘅說話，而阿董一開口，就愈嚟愈似一個兒童嘅夢囈，一句說話，兩把嘴講，效果完全唔同，阿董又點怪得香港人厭惡佢？證明政治智慧，天生有就有，冇就點樣學都學唔嚟，好難勉強嘅。
錦濤哥重有重頭戲，就係竟然公開會見台灣亞太經合會議領袖代表，中央研究院院長兼陳水扁總統親信李遠哲，會見全無先設條件，例如叫李博士先大嗌三聲「承認一個中國」，先至有得傾。
雙方高手過招，李遠哲轉達陳總統問候，恭賀中國神舟火箭上天，而小胡就話，呢啲係包括台灣人在內嘅中國人嘅光榮。雙方笑騎騎，言語之間拳來腳往，好睇過《臥虎藏龍》嘅楊紫瓊大戰玉嬌龍章子怡。
比起董班子同埋成班挺董土共日日嘴啫啫，講之不盡嘅廢話，胡李之會嘅對白，先至叫做世界級。胡主席，您辛苦了，限於形勢，您一時未能撤換廢董，香港人都好體諒，但願您多保重，早日有毛有翼，展翅毅進，欽點過另一個智商正常啲啲嘅人做特首！
傳真︰2623-9278
電郵︰