大酒店（045）抽水11.5億元，仍無阻港股升勢，恒指再升102點，收報12250，成交達180.70億元，扣除大酒店批股成交上板，只得168億元左右。銀行股繼續炒上，中銀香港（2388）有唔少空倉，近期股價日日升，迫唔少淡友要平倉，刺激此股噚日一度再升逾3%，高見14.40元。至於平完倉後重有冇買盤跟進就好難講，睇落都係位高勢危。東亞（023）追落後，大升7%，升至23.50元收市。
新任財爺唐英年今日發表理財哲學聲明，同埋會講開源措施。市場預料佢唔會有乜具體方案公布，而唐英年亦多次表明，唔可能在06/07年度完成滅赤大計。本港經濟好轉大家有眼見，所以估佢會調高今年經濟增長預測。正常情況下，市場對佢嘅聲明應該唔會有太大反應。
e莉莎則話，大市資金充裕，即使財爺聲明冇料到，或者已在預期之內，一樣可以成為炒上藉口。呢個e莉莎果然係大好友。事實上，最近大市成交略減，主要係因為資金走咗去玩IPO。據聞中航科工（2357）認購反應相當熱烈，之後重有隻人民財產保險跟住上。當資金回流後，大市開始做年尾櫥窗粉飾。
超大（682）全年賺7.25億元人民幣，增長17%，除派息每股3.49仙外，重有紅股送，20股送1股。消息刺激股價勁升22.4%，收報1.91元。管理層暗示，旗下持有49%的廣西橙園計劃上市，隻股可能重有排升。阿虎記得，VP曾以5280萬元向大股東購入6000萬股，每股相當於0.88元，現價計賺咗成倍。
阿 虎