偉大祖國圓滿成功發射及回收第一艘載人太空船成功，大陸同本港傳媒都搏晒老命，中央台係大佬，做足四十二小時特別報道。
不過中央台始終有特權，香港傳媒就冇咁好招呼。八方聽聞，三個電視台參加咗一個去酒泉睇升空嘅旅行團，以為滿懷愛國熱情，報道有着數，點知一向愛國唔執輸嘅A台太勇，引起當局不滿，搞到人人都不准靠近，惟有望天打卦，將個鏡頭一味拍向天。
有線電視徐月娥嗰隊今次收穫最大，第一日差唔多同新華社一齊喺上午九點零八分宣布神舟五號成功發射，佢哋拍到一條火箭升空嘅白煙嘅國家機密，就即時判斷係載人飛船。
到第二朝，徐月娥又係第一個見到架飛船喺天空出現，佢話現場好靚，攝影師冼劍輝對準，喺六點零五分拍到飛船返回地球嘅歷史一刻，八方問有線助理總監馮德雄，佢話都冇諗到咁好彩。7.1倒董，有線新聞出名夠勇，今次神舟上天，又得神庇佑，攞到獨家嘅一陣煙畫面，真係抵阿頭趙應春有得參加新聞界上京團呀。
傳真︰2623-9278
電郵︰