老董今日由曼谷返港後，唔知係咪經胡主席點醒，開始接見立法會議員，民主黨就安排咗星期五見。八方噚日同白鴿黨主席楊森傾開，佢話今次算係7.1後第一次獨家同民主黨會面，上次成批民主派見，唔算數。
雖然係人都知老董對反對派一向都係得個聽字，左耳入右耳出，但楊森都好阿Q咁講，認為見好過唔見，有得交流好過冇得交流。
為表誠意，同埋以免阿董話佢哋「冇建設性」，白鴿黨重特別準備咗一本施政建議畀阿董，當中梗係離唔開叫佢解決啲大約四十歲、學歷只有小學程度人士嘅就業問題，要老董訂出長遠嘅就業政策；又會再次叫佢發行債券，解決財赤。
最重頭戲，都係要阿董下令林瑞麟快啲喺年底做政改諮詢，以免夜長夢多，又準備叫佢參考英國國會通過嘅諮詢守則做民意搜集，費事到時拗數。不過，呢類見面，都係得個姿勢，阿董都成六十幾歲人，到呢個年齡，會有轉死性咩？
傳真︰2623-9278
電郵︰