英格蘭足總終於就曼聯領隊費格遜，兩個月前對紐卡素比賽被逐出場判案，決定罰款一萬鎊同禁止領軍兩場，紅魔就決定唔上訴。我求大俠亦認為係明智決定。
老費今次俾足總判罰，令佢帶領紅魔十七年以來從未被判罰行為不檢的清譽毀於一旦，所以肯定唔順氣；曼聯方面最後決定唔會同老費上訴。老費會喺周六主場對富咸一役，同下周聯賽盃作客列斯做「遙控司令」。
我求大俠覺得，既然判罰唔算太重，放棄上訴係正確決定，始終李奧費迪南單藥檢案禮拜四就有判決；如果自己有唔啱重要上訴，同足總關係咪更惡劣，到時李奧真係停賽半年就影響重大。
阿巴莫域治入主車路士後新聞多多，呢位富豪出位到三日前踩入阿仙奴軍營，雖然「兵工廠」准佢入去，係因為佢只要求視察球會設施。不過，有傳佢入敵方軍營，可能有意搵其中一位主將過檔。我求大俠真係好少聽班主探對手軍營，唔通兩間球會想聯盟合作，齊齊對付紅魔鬼？
紐卡素證實前鋒比拿美會去美國接受膝部手術，幾個星期都唔可以上陣。我求大俠都替比拿美膝部問題擔心，因為計埋今次，佢兩邊膝部合共做咗六次手術。雖則今次嘅醫生史迪文曾經將舒利亞膝傷完全根治，但比拿美只得二十四歲，就算好番，要踢到三十幾歲先收山都好難。
曼城科拿嘅表現一直無起色，足球事業前景真係唔多樂觀。不過，佢有唔少副業增加收入，其中一樣就係買樓收租。最近有個調查，科拿𠵱家喺英倫有多達八十五個單位收租，冠絕英超聯，僅隨其後嘅修夫基都只得三十三個，我求大俠都不得不佩服科拿嘅搵錢本領。
繼古柏俾國米炒魷後，安玻里都炒咗巴迪尼，由佩洛堤頂上。我求大俠真係估唔到，球季開咗兩個月，四大聯賽「炒教練潮」第一波咁快就湧現，聽聞愛斯賓奴教練奇文迪都危危乎；重有德甲未贏過嘅柏林哈化，都向教練史堤芬斯表明，兩場無表現即炒，不妨留意呢幾隊！