八方噚日收到前學運領袖王丹第一時間報喜電郵，唔係賀神舟上天，係話佢上星期順利通過哈佛歷史系博士資格考試，心情好激動。
「這是我讀書生涯中一個里程碑。」王丹喺電郵中咁樣形容。咦，乜啲字眼咁鬼似《人民日報》社論嘅？主持佢今次筆試同口試嘅老師全部係頂級人馬，包括哈佛文理學院院長WilliamKirby，歷史系主任AkiraIriye，以及東亞系教授MichaelPuett，王丹後嚟喺長途電話中同八方訴苦，話早前一切社會活動都推晒，實行閉門讀書。
捱過咗個資格試，跟住佢就開始寫論文，題目係比較大陸同台灣兩地嘅社會轉變，估計又要三、四年時間完成。王丹九八年獲准保外就醫去咗美國，轉吓眼又過咗五年，比起吾爾開希，柴玲成班前度戰友發晒福，李祿就發咗迹唔係咁識人，王丹重係咁書生。佢最想嚟香港見班老友，更想返大陸，王丹對胡溫抱有期望，但係未知幾時可成行，好彩佢父母十一月會出國去美國探佢，到目前為止，胡溫都冇話唔批准。
傳真︰2623-9278
電郵︰