內地賣樓好多時乜都要豪要大，連模型都特別大過人。金豐易居董事朱旭東話，下個月喺香港搞嘅大型內地樓盤推介會，就會將有成八百方呎嘅北京朝陽區樓盤「公園大道」模型搬嚟香港，（足足等於香港成千呎建築面積單位），聽佢講模型會詳細點出朝陽區嘅建設同規劃。另一個有成六百方呎嘅上海浦東樓盤模型，也會來港同場展示。
蘭西喺香港睇樓咁耐，真係未見過咁大嘅模型。想見識吓嘅，不妨下個月去展銷會睇吓。
另外，金豐易居為隆重其事，下月重會包專機，接載內地發展商、內地傳媒同埋有能力投資香港物業嘅目標客戶嚟香港，參觀本港嘅樓盤同商場，初步暫定會去睇長實、嘉華同恒基啲盤。成團人有成二百人，包三日兩夜嘅酒店住宿，出手認真闊綽。
市民置業年輕化現象，開始喺深圳出現，深圳市萬科房地產有限公司，今日喺深圳嘅萬科金域藍灣樓盤現場舉行研討會，由萬科房地產總經理助理陳麗明，同深圳中原董事長賴國強主持。內容係「三十現象，置業為尚」，即係講三十歲買家置業嘅情況。
研討會一兩日後重會放上網，網址係
點解個研討會揀喺住宅盤內舉行？聽講因為係深圳萬科近十年所起物業中嘅精品，又可能係個盤有唔少三十歲買家，到時順便做例子啩。
好多發展商都採用「重賞」政策，催谷地產代理賣樓。產量唔多嘅英皇集團，喺大埔半山嘅龍成堡，差唔多賣晒。聽講，發展商淨係畀佣同埋獎金，分別係800萬同400萬，夾埋成1200萬，數目都唔少，以呢個盤現時賣咗74伙，套現3.7億元計，比例有成3%，認真「和味」。
雖然話𠵱家個市旺番，但就唔係個個發展商都咁重手。據聞，美聯有同事淨係做呢個盤，做到90萬數，估計可分到二十幾萬落袋，唔嘢少。
近排樓市轉旺，唔少摸頂入咗貨嘅業主，趁好價賣樓鬆綁，當中包括周啟邦夫婦嘅收租物業，大坑道五十八號兩個單位，喺97年高峯期以一千八百四十八萬買入，啱啱以九百六十萬交吉賣出，兩個單位夾埋有四千呎，呎價二千四百蚊，帳面足足蝕咗八百八十八萬，貶值四成八。
以四十六年舊樓嚟講，都算跌得少，何況兩個單位之前每個月只係收四萬零蚊租，租金回報率只有兩厘六，對比𠵱家嘅豪宅至少五厘回報，套現換貨都係明智之舉。
蘭西
電郵地址：