唐英年做咗財政司兩個幾月，間官邸上星期先至搵到承建商裝修，唐唐嘅新聞秘書講，工程最快要十二月完成，聖誕節期間先可以入伙，連內連外，大概要花納稅人一百四十幾萬。
羅秘書如數家珍咁同八方計，今次嘅裝修以最minimunapproach進行，只係限於正常維修，好似做吓屋頂防水，髹吓油，因為係人都知，曾幾何時，大約兩三年前阿松入住個陣已經用咗二百幾萬嚟裝修維修。但羅秘書話，唔知點解阿松未將啲水喉管換銅喉，今次做番。
但阿松個家庭影院肯定唔啱唐唐用，因為唐唐有三女一仔，只會唔夠房用，睡房同洗手間都有工程要做。至於戶外，就只係個網球場要整吓塊地。無論點慳，冇人會好似夏鼎基當年咁，要啲仔女自己除草先有網球打。
傳真︰2623-9278
電郵︰