美國總統布殊同國務卿鮑威爾到曼谷參加APEC會議，口痕友話佢哋最關心嘅議題唔係人民幣，而係能否安全返屋企。為咗美國代表團保安，曼谷鬧市變死城，君悅酒店附近兩條街完全封鎖，連八方至愛嘅四面佛都受到影響，香火大減。
但八方估唔到泰國為美方安排嚴密嘅保安，竟然會累到美國自己人。話說鮑威爾噚日喺APEC工商領導高峯會演講，之後馬上上樓同中國外交部長李肇星進行雙邊會談，美國CNN等記者採訪完演講，跑到去會談場地門口，就俾人攔住做安全檢查，查得兩查，會前拍照時間已經完結。
中國同香港記者一早到場做安檢，結果順利影到兩人言笑晏晏，美國傳媒惟有駁料駁片，都幾狼狽。
八方晚上睇見電視台播放呢群領袖嘅晚間活動，佢哋去一個海軍會所睇表演，但今次唔坐名貴房車，反而坐泰國有名嘅篤篤車，泰國總理他信重有保鑣在旁跑住保護。據八方所見，特首董建華係同日本首相小泉坐埋一齊，但可惜見唔到國家主席胡錦濤同台灣領袖代表李遠哲嘅坐位安排。
傳真︰2623-9278
電郵︰