胡杏兒及李彩樺現正拍攝無綫劇集《彩虹橋》，但近日有傳胡杏兒耍手段爭戲，向高層要求改劇本，結果李彩樺慘變犧牲品。李彩樺昨承認戲份減少了，她還說：「戲份係比之前少咗，唔止我一個，其他人重少㖭。」
胡杏兒去年憑劇集《流金歲月》中智障人士角色奪得無綫台慶「我最喜愛的飛躍女藝員」獎，而早前她在劇集《律政新人王》的演出亦備受讚賞。隨着獲公司力捧，胡杏兒的是非愈來愈多，昨日本報接獲一名自稱無綫中人來電報料，指胡杏兒扮大牌，不滿拍攝中的《彩虹橋》戲份未夠重，故向高層提出加戲份，及後劇組又確有劇本改動，另一女角李彩樺（Rain）被刪戲之餘，有部份鏡頭更需重拍。
據知《彩》劇中有三條主線，胡杏兒與謝君豪為一對，吳美珩與單立文就發展另一條感情線，李彩樺及新人黎諾懿則扮演一對。或許因為胡杏兒和阿Rain年齡相若，加上所佔戲份相近，故便傳出兩人拍劇期間爭風呷醋。
昨日本報就此事致電阿Rain求證，她坦承自己在《彩》劇中的戲份比之前減少，她說：「劇本係有改過，戲份比之前少咗嘅亦唔止我一個，其他人可能重少啲。但我唔理呢啲嘢，我覺得戲份多同少都唔緊要，用心做好就得啦，做演員要做好自己本份，所以我冇為呢件事而唔開心。」
既然阿Rain戲份比前少，未知她有否向監製了解？她說：「冇呀，好多嘢係好多人一齊商量，我唔係編劇出身，會尊重公司嘅決定。但我拍呢套劇好開心，杏兒教我好多嘢，我好感激佢，你哋唔好講到變成是非啦。」至於胡杏兒的戲份是否比前增加，阿Rain就語帶雙關地說：「唔知係咪多咗，但我見劇本分場，係有好多佢嘅名出現。」
胡杏兒昨日在電話中對爭戲一事則說：「我冇特登走去搵高層傾，係成班演員開會，大家討論下個角色係點，冇話講戲份或者其他問題，大家係講成個劇，唔係講戲份多同少。我點可能一個人去要求啲乜呢，我根本冇介意戲份，拍劇係teamwork，我唔希望啲人以為我好霸道。」
問胡杏兒會否擔心被人指為扮大牌？她說：「都擔心㗎，可能有時我講嘢太認真，講嘢直咗啲，希望啲人唔好見怪啦。」
對於阿Rain指胡杏兒教她不少，胡杏兒即說：「唔好話教，大家一齊研究啫，我年紀大啲，佢當我姐姐啫。我覺得可能有啲人以為一個劇多女仔，就總有事發生，梗會爭，其實大家只係溝通下。」
此外，無綫戲劇分部助理總監梁家樹，昨日在電話中說：「係幾個演員覺得劇情嘅處理要斟酌，大家反映意見啫，嗰日謝君豪同吳美珩都喺度，我哋唔會因為就胡杏兒而改，點可能呢？阿Rain因為之後要拍《我師傅係黃飛鴻》，所以佢喺《彩虹橋》嘅戲份唔係太重。」問他會否覺得胡杏兒扮大牌？梁家樹說：「呢個世界梗有好多人講嘢，講呢啲消息嘅人別有用心啦。」
採訪：朱倬誼
