韓國變性人河利秀近排都算多災多難，喺台灣成日傳出負面新聞，喺韓國又同事務所鬧翻，𠵱家使唔使改名都重未知。最慘嘅係佢上星期三先同TTM事務所解約，噚日人哋就突然將佢未曝過光嘅全裸照，擺上韓國Yahoo等幾個大型網站任睇唔嬲，重講明長睇長有，咁做法，分明就係要打擊河利秀，我羅拉都有少少替佢淒涼。
咁TTM就當然話冇報復企圖，呢輯相其實只係河利秀上年初喺泰國拍嘅寫真未公開嘅部份內容，河利秀未解約前已簽咗同意書，到今年十二月尾為止，佢哋揸住批相派街坊都得，今次擺一百五十張硬照、同五套短片上網，只係時間上嘅巧合喎。
但係河利秀近期想再大拍特拍裸體寫真都難，唔通自己打自己咩？而且人紅咗，就梗係唔想過去露骨寫真再俾人拎番出嚟講㗎啦，加上控制權唔喺手上，點知會唔會連好猥褻嘅NGcut都曝光埋㗎！
不過大家唔使太擔心，河利秀素來鬧交都唔會輸畀人，佢啱啱由台灣返咗韓國，打算開記招交代解約嘅事，到時佢肯定又會有新招數公布。