香港煙草業協會噚晚喺港麗酒店慶祝成立二十周年，周梁淑怡同黃宏發都畀面出席。
八方問發叔，同周梁摸住酒杯底乜咁好傾，點知發叔死都話冇嘢講，發叔當年同周梁一齊喺衞奕信內閣共事，但只做咗一年半載。
既然問開發叔，八方就乘機求教呢位新界東嘅立法會老大哥，點解由民建聯哨牙仔劉江華做大佬嘅公民力量今次咁威，喺沙田區有八個成員自動當選？點知帶幾分酒意嘅發叔話，公民力量係潛水嘅民建聯，而民建聯係潛水嘅共產黨，兩個黨喺水底互托互捧，梗係掂啦。
咁係人都知劉江華既係公民力量，又係民建聯，以前重係港同盟㖭，個個黨入過，瓣瓣都過晒，實行大包圍，只係未入過自由黨，不過，話說回來，八方都想知點解冇人同佢哋爭呢？反而哨牙仔重空降去沙田錦濤區同民主黨嘅何淑萍搶食。呢個世界就係咁，你一讓，就俾人坐大，民協嘅馮檢基人哋都照撼，就知對手唔簡單。
（圖）發叔（中）同周梁（左）喺煙草業協會酒會上，摸晒酒杯底好好傾。
傳真︰2623-9278
電郵︰