生活DIY：
波鞋舊變新全靠塑膠彩

波鞋已成潮流之物，限量版、復古版、Crossover等更成為追捧目標，代價是動輒過千的銀碼。着一段時間，波鞋有污迹、甩色、發黃等情形自然少不免，肉痛之餘亦有礙觀瞻。今日就由開舖幫人翻新波鞋的Maggie，教大家翻新波鞋5大招，等你繼續着住對靚波鞋出街「威」。
記者：招佩珊
攝影：梁細權　
Model：Cecilia（SunSpot）
鳴謝：米店（97735138）

出現在波鞋上最常見的問題，多是皮面出現龜裂（特別是腳掌前的屈曲位）、穿鞋帶的孔位甩色及白色膠位發黃。雖然這些並非大損傷，但始終會「篤眼篤鼻」。原來，一般在美勞用品公司可以買到的畫畫用塑膠彩，就是應付這三大問題的最佳方法。

鞋頭刮花
要處理刮花的鞋頭，Maggie教路只要在刮花的位置上髹層塑膠彩，便可將波鞋復原度接近九成，若龜裂的鞋頭位置出現甩皮，宜先將該位置用皮革專用膠水貼好，然後才補色。不過，上色後的一星期內，應避免濕水或清洗波鞋，以免甩色。

鞋踭膠邊發黃
若然白色的鞋邊發黃又點算？Maggie建議大家先用布抹去塵埃，因這會令上色的效果更佳，然後選用白色的塑膠彩，以較幼的畫筆，將顏料慢慢掃上。

其他翻新招數
𠝹刀刮走鞋頭膠污迹
鞋頭最容易弄髒，而該部位通常用硬膠製造，就算用濕布猛咁擦，都係抹得唔乾淨。Maggie提議用𠝹刀直接將污迹刮走，不過切記要輕輕力，免得留有疤痕。

AirMax氣墊搵牙刷幫手
氣墊與鞋底膠邊之間的隙縫位是藏沙泥及污穢的熱點，有些人會用𠝹刀刮走污穢，雖然效果唔錯，但並非最好的方法，因𠝹刀很容易會把氣墊弄穿。不妨利用牙刷把污迹刷去，原理就好像我們日常刷牙一樣。

棉質用梘水棄漂白水
處理棉質波鞋就同洗衫一樣，可用梘液或溫和的洗衣液加入清水中，然後洗刷棉質上黑色一撻撻的污迹，一公升水約用兩湯匙洗衣液。但不要用漂白水，因會令白色的棉質變黃，或有顏色的棉質甩色。另外，以手洗方法為佳，機洗會令波鞋變形。

小秘：技上色前先調色
Maggie教路，當用顏料為波鞋上色前，最好是先將顏料在卡紙上調色，比較波鞋顏色脗合後，才塗在波鞋上，如塗在布料位置宜將顏料調校稀一點。一盒6至7種顏色的塑膠彩約需$150-$220，若只用一次或一種顏色而要買一盒未必化算，你亦可找人代勞，市面普通一對波鞋清潔翻新約收$80、漆皮打蠟$50。

畫筆清潔麖皮夠經濟
麖皮容易黏塵，但用一般清潔用品清洗污穢會影響皮質，而麖皮專用清潔劑價錢又偏貴，約$60一支，Maggie就教曉我一個既簡單又毋須花費的方法。大家可用膠紙黏走塵埃，而污迹則可用畫筆掃去，效用唔錯又夠經濟，不妨一試。