新車速報:<br>豐田全新車系Sienta七人MPV

新車速報:
豐田全新車系Sienta七人MPV

家庭車市場近年起咗唔少變化,普羅用家買車唔再局限於四門三廂式嘅傳統轎車設計,尤以擁有三排七座位嘅家庭式MPV亦漸受追捧,身為日本老大哥嘅豐田車廠,繼發展EchoVerso及CorollaVerso之後,早前更響東瀛本土推出真正七座位全新Sienta車系,而首部新車更剛啱火速運抵香港㖭!想睇吓部車有幾正?就真係唔好錯過今日嘅介紹喇!

記者、攝影:陳偉林 
ImageGirl:Wendy

過往喺家庭車級別中,鮮有七座位車款供用家選擇,皆因尺碼限制好難做到稱心滿意嘅車廂空間;惟豐田響近年間,亦積極開拓呢個市場,兼且重有唔錯口碑同銷量,當中Spacio會係一個不折不扣嘅好例子。

■座艙陳設時尚悅目,亦能予人一份闊落舒適感。

方匣子賣相別致吸引
然而,想要做到車廂夠寬敞,方匣子嘅車體輪廓總不可少;而Sienta本身重加有圓潤線條修飾,加上一副趣致面孔及一對大眼睛嘅車燈組合,既討好又不失時尚感。難得車身兩旁還有趟門設計,左邊重有全自動開關功能,用起上嚟方便又愜意㖭!

■左右雙趟門配搭,上落倍感輕鬆之餘;就算後排乘客進出車廂,亦沒有半點侷促感。

■中、後排座椅可組合成敞大嘅卧鋪,最啱郊遊時作休憩用。

座艙寬敞多變好實用
打開車門,你不期然發現車廂空間好寬敞,尤其係尾排足可以坐上兩名成人外,原來後排重可以潛藏於中排座席下,以騰出更大嘅尾廂空間。再者,中、後排更可配搭成卧鋪,加上中置車頂嘅天窗,重予人一份舒泰嘅閒適感㗎!其次,車內還有齊冷氣、音響同前後獨立照明,大可媲美一般轎車配搭呢!

■尾排可收摺放平,令尾廂容量倍增。

■前排乘客椅下備有鞋櫃組合,最啱女士們使用。

■一體式中控台編排,有齊音響及冷氣組合。

1.5公升偈輸出平均有力
新車用上一台1.5公升直4偈,匹配SuperCVT無段變速自動波,反應及加速有力,又易於操控;而低地台低重心設計嘅底盤,加上四輪歐式懸掛組合,行車既平穩又暢順,完全沒有半點因車高而影響可靠性㗎!至於車身低腰線設計,重畀到你有遼闊嘅視野㖭!

■中置表板組合,資料豐富又易看。

■圓渾嘅車頭設計,既Cute又見活力感。

■高置High-mount煞車燈,有多一份安全感。

記者評語
雙趟門上落方便

中小型家庭MPV有興起之勢,呢部Sienta可算係給用家度身訂做嘅新車款;外形討好之餘,車廂三排七座位配搭尚算闊落,加上左右雙趟門組合,有利元素一應俱備,配合上豐田汽車向來嘅可靠性能,大賣機會指日可待。

Wendy評語
座椅靈活多變夠實用

呢部全新豐田Sienta嘅造型既Cute又吸引,而且車廂空間重好闊落;最令人意想不到嘅,會係中、後排座椅重可以組合成卧鋪,又或者將尾排收摺起來,令尾廂空間變得更大更實用㖭!

■中排地台下置有雜物匣,盡用每一寸空間之餘,擺放雜物更見方便。

■三幅式軚環轉向輕盈準確,把持亦恰如其份。

■中置式傳動系統,有就手易掌握嘅好處。

豐田Sienta1.5規格
引擎:1496cc直4DOHC
馬力:110ps/6000rpm
扭力:14.4kgm/4400rpm
傳動:SuperCVT無段變速自動波,前輪驅動
懸掛:(前)柱式獨立(後)拖曳臂
制動:(前)透氣碟(後)鼓式(ABS)
輪胎:175/70R14ToyoJ36
尺碼:4100×1695×1670mm
軸距:2700mm;車重:1220kg
平均耗油:19.0km/L
新車售價:$164,700起
車輛提供:富利堡汽車(28776700)

■低地台組合有利行李及乘客上落,行車亦見穩定。

■新車以一台1.5公升偈作配搭,演繹出慳油好力嘅特性。