《維港巨星匯》，包底的八千萬凍過水。拍心口承包那個人，不是賭王千金或者趕到北京大合照的富豪二三代。一個厚面老臉的部門阿頭，有能力豪氣地包場、包飛、包騷，閒閒哋擲它八千萬落維港填海，唔使擇日子，真金白銀大你美國佬，王子滾石通通幫我包起佢！盧維思的洋相一睇就知是比中國奴僕高級的公僕，這次一顯豪氣，架勢超凡，似係LV時裝店叫個女sales包起幾萬銀的奶粉袋，準備送給上海小蜜的中小企老細。
奶粉袋包不住我們納稅人的火，八千萬，又唔見嗜食餃子的你同我包得起？盧維思不是大款，但舉手投足開始靠近趙公子，條命似乎好過曾經公子哥兒過的楊永強，所以盧維思一錯再錯，都不必眼淚垂，做公關苦情表演。八千萬，像一次過買大細，一鋪清袋，盧維思代表香港做莊，輸到甩褲但面不改容。香港勝在有ICAC的口號落後了，與時並進，香港勝在有高官公僕敗家仔撐場。敗家即是表明，我們敗得起，因為家山厚，人丁旺，就算財散人亡，仍然撐得起，花八千萬向外宣傳的，主要就是晒命晒身家。還專登晒蠢人當道，無行無德之徒當權，一樣死唔去，香港好風水。玩得、使得，包底得。有甚麼唔得呢？頂撞地產商唔得，向市民認錯唔得；落台又如何？well，個個自我感覺良好。over。