美股上周五偏軟，不過港股照升可也，事關中美將成立一個專家小組洽商人民幣自由浮動的發展，再引起市場憧憬人民幣升值。港股全日升103點，收報12147，成交162億元。中國肯傾人民幣自由浮動，相信是緩兵之計，至於幾時至真正落實自由浮動，可能係十年八載之後。
銀行公會下月中北上，傾香港銀行經營人民幣業務，屆時可能有好消息都未定。中銀香港（2388）成為人民幣結算行呼聲最高，噚日股價再升4.1%，收報13.95元，成交6億元。里昂叫人換馬至東亞（023），東亞亦升3.5%，恒生（011）則以一條紅衫魚收市。
港股近日陰啲陰啲咁升，加上香港經濟又真係改善中，淡友都咪話唔心寒。噚日收市後大酒店（045）配股抽水11.5億元，是繼恒地（012）後，另一大型抽水活動，斷估淡友都會借機反攻，挫一挫好友銳氣。
建發國際（223）聽聞想供股集資，但有人驚一旦供股可能令股價插水，所以最後取消，改以發行認股證代替，結果復牌一樣大跌12.9%，收報1.35元。公司是次發行4316萬份認股證，每份作價0.58元，不過行使價就低至0.69元，每股總行使成本只需1.27元，較停牌前報價1.55元，大幅折讓18%。好彩嘅係股價尚未跌破股證的總行使成本。
黑客話，供股好難炒，但發認股證就易炒得多，聽聞建發嗰批認股證盡落入友好人士手上，待收集得七七八八以及完成認股證配售後，建發相信好快會開車，不宜睇得太淡。
阿虎