國家主席胡錦濤喺曼谷酒店召見阿董，出嚟講嘅嗰番說話，由字詞同表情，都講咗好多內容畀香港人知道！
錦濤哥話，佢已經對董建華講，要改善香港嘅經濟，就必須保持社會嘅穩定，同埋符合香港市民嘅利益。
錦濤哥嘅說話，極之清楚，「保持社會穩定」，第一責任在於阿董，唔在香港人。佢若果施政亂咁嚟，做埋啲危害香港人利益嘅事，激發五十萬人大遊行，政黨同佢反枱，咁就係佢要問責，而唔係香港人反董亂港唔生性。
胡主席嘅講話，暗示咗呢一段因果關係，亦係間接話畀香港人知：23條立法，就係危害香港穩定同市民利益嘅粗暴行為，激起五十萬人大遊行，搞到經濟衰退，人心驚恐。言下之意，胡主席警告緊阿董：要經一事，長一智，唔好再亂嚟！
好在國家出手干預，撥亂反正，一手嗌停，將二十三條立法無限期擱置，跟住再「屍爬」自由行，直接揼水入嚟，呢兩招，就係以胡錦濤為核心、曾慶紅為港澳事務政策設計師嘅對港政策新思維發功嘅效果，終於大見成效。
喺曼谷，胡主席由始至終冇講過：「23條立法係維護國家安全必須嘅行動」，亦冇講過「要警惕一小撮反華亂港分子危害國家安全」，亦冇講過「搞阿董，即係想顛覆中央」，佢叫阿董：保持穩定（唔好搞咁多嘢），符合市民利益（唔好再做六百萬香港人嘅公敵）。
胡主席嘅曼谷講話，就係今後阿董施政嘅思維方針，八方要警告阿董：唔好再將你嘅無能同失敗，賴晒香港人，你要問責。23條立法，根本上已經無疾而終。
同時，八方亦好想問吓以民建聯為首嘅土共：咦，乜唔係「沒有國，哪有家」咩？乜唔係23條立法，要盡快迫切實現，如果唔係，23條一日未立法，特區政府就一日違反緊《基本法》咩？唔好搞埋啲慶神舟抬火箭嘅派對遊行，五十萬人遊行，乜唔係受到一小撮人誤導咩？要面對全港市民，向市民答覆：你哋有冇誤導過阿董，有冇暗中裝設彈弓香蕉皮，有冇監阿董做壞事，想佢撼頭埋牆死，當正佢係一名低能鬼（雖然佢的確係），而自己就想向國家邀功？
香港人嘅「7.1精神」，光照青史，六百萬人喺香港史上取得輝煌勝利，當家作主，阿董，胡主人嘅訓話，字裏行間嘅訊息，矇查懵懂嘅你，收到未？
傳真︰2623-9278
電郵︰