個市愈升愈有，恒指一度低過萬二點，但同近期走勢一樣，一低就有錢倒落去，埋單又係高收，進帳超過100點。
炒股同炒輪，各師各法。有人喜歡揀強者，即係升勢好急嗰類，博個勢持續多一段時日。有人喜歡揀啲落後者，博落後追番上去。
近期恒指穩步向上，但個別股份則跑贏指數，例如中銀（2388），唔信唔信又升多55仙。喜歡揀強者嘅，當然可以搵中銀Call輪埋手，不過大部份中銀Call輪經過一輪衝鋒後，槓桿率得番3倍幾，爆炸力弱晒。當然，如果正股5%、10%咁樣再升，槓桿率3倍幾嘅Call輪，一樣會彈吓彈吓。
中銀勁爆，冇理由滙豐（005）唔升，唔通滙豐唔係銀行？滙豐遲早輪到，老老實實，買滙豐Call輪好過高追中銀Call輪。滙豐Call輪呢兩日除咗升得少之外，槓桿率夠爆係主要炒賣點，另外好處就係負溢價或者溢價低。本欄例牌推介嘅係9845同9908。
長和系始終會成為升市主角，佢哋嘅Call輪咪錯過。昨日提過，長實Call輪對象係9074與9065。和黃（013）昨升25仙，升得慢，英國3G陸續有好消息，股價隨時跑番快啲。買和黃Call輪，9914與9066係一對主角，想搏殺一啲，9066比較啱。
章盛