大鼻歌手自從攞咗個歌王獎之後，音樂事業竟然直線下滑，佢重不惜攞個女朋友出嚟自我宣傳，佢早前換咗經理人之後，就喺出面唱舊經理人做嘢唔掂，新經理人就幫佢接到好多嘢做咁話，其實暗地裏佢都不知幾驚。
大鼻歌手最近做緊唱片宣傳，冇咗舊經理人做靠山之後，佢連唱片公司都信唔過，竟然親自去Pulp歌，四圍打電話畀電台DJ，硬銷新歌之餘，又約食飯搞關係，咁都不特止，佢連啲電台節目小監製都唔放過，幾乎人人都收到佢電話，好多監製仔都話受寵若驚，嚇一跳之餘，真係覺得佢有極度不安全感。試問除咗本身好老友之外，邊有歌手會自己約DJ同節目監製食飯打歌呀？
大鼻歌手行到呢一步，對佢嚟講都算折墮，點知最慘嘅係佢平日碼得最行嗰兩個電台高層，最近俾人燉咗冬菇，調咗去做sales，唔好話播唔播歌佢哋理唔到嘞，分分鐘掉返轉頭，要叫大鼻歌手落佢哋廣告㖭呀，不少電台中人都掩住半邊嘴笑大鼻歌手跟錯大佬呀。
2R嘅Rosanne同Race日前到澳門為無綫拍旅遊特輯。由於拍攝要喺五日內完成，而咁啱呢段時間係2R全新EP嘅宣傳期，所以2R每日拍完嘢，就要即刻搭船返香港做嘢，令到一向怕坐船嘅Rosanne大叫頭痛，佢同助手由上船至落船重嘔足七次㖭。咁來來回回，計埋計埋，咪要嘔足七十次，難得佢重可以咁精神喎！
孫燕姿前日喺上海以代言人身份出席「仙境傳說」電子遊戲宣傳，佢喺八月時宣布會休息一年，會去美國紐約嘅餐館打工，但係講就咁講啫，孫燕姿不單止工作冇減少，佢重不停出席宣傳活動，擺明用暫休嚟宣傳。華納唱片高層陳澤杉話：「孫燕姿休息是指不出唱片，但宣傳和代言工作會繼續，只是記者誤解而已。」
係人都知徐若瑄成日寫歌詞畀周杰倫，好似《開不了口》同《龍捲風》都係出自徐若瑄手筆。點知原來喺徐若瑄心目中，周杰倫係最難搞嘅歌手，因為喺徐若瑄嘅紀錄之中，寫得最辛苦嘅係庾澄慶首《天堂》，因為對方退稿退咗四次先收貨，但後來呢個紀錄俾周杰倫打破咗，佢嗰首《愛情懸崖》前後退咗五次稿先搞掂，真係好朋友都冇面畀。
蔡卓妍（阿Sa）早前喺新片《古宅心慌慌》中，有一場戲講述佢產生幻覺，畀Boy'Z嘅Kenny同Steven「啜」腳趾，事後Kenny同Steven異口同聲讚阿Sa隻腳好好肉，而阿Sa就話拍呢場戲嘅時候好似拍緊三級片咁。馮仁昭覺得阿Sa嘅「微波」身材，點拍都唔會令人有遐想啦！
陳百祥（阿叻）、譚詠麟噚日喺旺角以明星足球隊身份同亞視電視隊踢咗場友誼賽，雖然明星足球隊以三比一贏咗，不過比賽唔夠十五分鐘，阿叻就已經俾球證用紅牌趕出場，因為佢同樓南光爭波嘅時候有少少碰撞，點知阿叻唔忿氣再走去兜多對方一腳。其實輸贏唔係問題，不過踢得波就點都要有啲波品。
汪明荃噚日為港台節目做主持，請咗李司棋做嘉賓，稍後有一大班藝人到北京同領導人會面嘅訪京團，問阿姐會唔會去？佢話：「我都喺北京，因為無綫都有show喺北京做，佢哋有邀請我，我睇吓就唔就到時間啦，我都想去嘅。」阿姐話想發表吓佢嘅意見，因為直接見到領導人係一件幾難得嘅事。唔知阿姐會唔會講番同特首夫人爭廁所單嘢呢？
