瘦身後的李蘢怡（Tiffany），身材Fit到漏，不但男士話吸引，連女士也大讚。不過，Tiffany這副身材得來不易，自言加倍珍惜，日常飲食奉行多菜少油的原則，佢重話KeepFit一樣可以食肉，當然首選是白肉，她最鍾意就是雞肉、魚肉，所以今日她將為大家炮製一款酸咪咪而又醒胃的雞肉串，希望大家會鍾意啦！
記者：羅惠芬
攝影：林栢鈞、楊錦文
場地提供：美麗華酒店CoffeeShop
鳴謝：維景酒店張伯基大廚
見Tiffany真人，不但身形Fit，皮膚亦相當好，當然要向她請教有何秘訣。「最重要留意日常飲食習慣，少食多餐、多飲水和果汁、多吃生果都好有用。」
Tiffany的食經，自8歲開始。第一次，因為弟弟喊肚餓，她用隔夜白飯弄了碟炒飯，細佬食到舔舔脷。自此她就努力研究煮食，最威水嗰次，是在加拿大讀書時，弄了共9個餸給前男友食，對方自言甜到入心。
年紀輕輕的Tiffany，原來有個心願，就係：嫁個好老公，煮餐好餸𠱁對方！「我思想好傳統，覺得識煮菜才算好太太。我希望老公放工返屋企，可以食到我親手做嘅晚餐。」她最想學煮的，竟然是俄羅斯、越南等冷門菜。原因好簡單，因為出街食太貴，自己整可以慳一筆，真係有晒做好老婆的條件──夠精打細算。
別以為Keepfit一定是無啖好食，Tiffany同樣會食肉類。「少食紅肉，以雞和魚等白肉最好，食多都唔怕皮膚變差。」這個肉串以雞肉為主，加埋青椒、橙椒、蘑菇等，醒胃之餘，食落重唔膩，夠晒清甜可口。
用咩料：
雞胸肉200克、青椒及橙椒各1/2個、洋葱1/2個、蘑菇5粒、橄欖油50克
汁料：
羅望子茶5湯匙
紅椒碎20克
鹽適量
沙律是Tiffany的至愛之一，得閒就會整。不過，她嫌市面買到的沙律醬卡路里太高，次次都會自製。「今次用羅望子茶做成沙律汁，效果竟然唔錯，酸酸哋唔怕肥。」
用咩料：
豬頸肉100克、沙律菜200克、橄欖油2茶匙、黃椒、青椒、洋葱和芹菜各100克、松子仁50克、羅望子肉50克
沙律汁：
羅望子茶5湯匙、粟粉半湯匙、砵酒適量
阿Bee：肉串好清甜，尤其個汁酸酸哋，夠開胃。
1.羅望子肉含有大量維他命A、B和鈣質，聽聞非洲人會用嚟做醃料和調味料。大型超市有售，約十零蚊一百克。
2.羅望子茶味酸甜適中，同樣喺大型超市有售，約$5.5一罐。
