自新藝城散檔之後，各個老闆各自搵食，其中自言百足咁多爪、不嬲都搞好多嘢嘅石天，近年北上搵食。佢噚日就以市務策劃總監身份，向傳媒推介東海聯合集團發展嘅深圳港麗豪園。
問石天個盤甚至間公司有冇份時，佢回應只係做「跑腿」喎。
但唔知係咪太耐冇拍戲，心癮起，今次親自策劃兼粉墨登場，拍咗個介紹港麗豪園同深圳點好嘅廣告片，製成DVD，片名叫「北飛叠影」。佢話睇完套片就知片名點解嘞。但可能蘭西蠢得嚟又爭少少幽默細胞，睇完都只係領略到「北飛」嘅意思，「叠影」就諗極唔明。
正如佢老哥所講，𠵱家大陸商機處處，市場廣大，甚至只要整支有特色嘅牙籤，都可以發達。
所以佢老早就開始喺大陸「搞搞震」。「北飛」即係北上搵食是也。
佢重話，因為CEPA關係，𠵱家港產片等同國產片待遇，因此，佢都心郁郁好想再拍番戲，但諗到𠵱家大陸翻版咁猖獗，即刻窒住。
然而話時話，蘭西睇到佢隻DVD大大隻字寫住「歡迎盜版」，初時都呆一呆，但回心諗，如果真係有人盜錄套片通街派，咪即係幫個盤免費宣傳，條橋幾絕呀！
中半山帝景園因為豪宅大王建萊集團泰錦釗嘅二十四個單位，畀銀主沒收同放售，引起市場關注，咁啱噚日土地註冊處有一宗帝景園大手轉讓，係第二座嘅一至四十六樓A室，一樓及十至十四樓B室，同其他物業，以三十九億八千七百萬，賣咗畀Dipende公司。
呢間公司嘅營業地址係灣仔新鴻基中心四十五樓，即新地總部，咁睇單交易應該係內部轉讓。公司董事重有大家熟識嘅樓神雷霆同蘇仲強。
蘭西記得新地以前都曾經有將啲貴重物業內部轉讓，點解咁做就好難估。
天氣開始轉凉，市民開始擔心沙士會重臨香江，聽講物業管理公司已經開始做定抗沙士嘅準備工作，好似查吓要訂購啲乜嘢防沙士用具，重有就係訓練員工做足清潔工作。
蘭西聽講，有物業管理公司問過政府，今次應該要點做防範工作，答案係冇新指引，即係用番之前嗰套方法。究竟夠唔夠，管理公司惟有自己衡量。不過，萬一出事政府又使唔使問責呢？
𠵱家有唔少大學生加入地產代理行業，港大金融學會一行三十人，噚日參觀利嘉閣，了解地產代理嘅運作，當然重有收入情況。利記執行董事廖偉強、董事總經理何紹章同部門主管，都齊齊現身說法，內容十分到肉。學會重順道睇埋利記下晝舉行嘅記者會，令佢哋認識到呢行，原來唔止係拉客買樓咁簡單。
另外，美聯大學堂上個禮拜六，應中聖書院邀請，舉辦講座，教年輕人點樣發揮最佳嘅溝通技巧。由於呢個係美記訓練員工嘅課程，所以內容多少都涉及代理嘅溝通技巧。
經濟氣氛好番，酒店業都有改善，走家庭式酒店路線嘅馬鞍山海澄軒，趁機搞優惠催谷一吓。聽長實高級營業經理劉啟文講，今個秋季會搞三重賞租住計劃，凡係入住半年或以上嘅租客，可享額外三個月免租優惠，即係比六個月租金，就住九個月。
優惠名額三十個，不設租住房間限制。另外，送一千蚊代用券，同埋三十程往來尖沙嘴車票，總值最高十萬。
現時長租出租率有七成，月租由兩房嘅七千至萬五蚊，三房萬九至三萬三蚊。租客有九鐵機組人員，外籍教授、製造設計業同物流管理人士。日租客房佔出租率三成。今個禮拜六日會搞嘉年華，有化妝彩繪表演同埋連串水上遊戲，免費入場。
另外，長實的北京東方廣場，本月舉行「香港魅力映東方」嘉年華，而香港旅遊發展局嘅「香港——愛在此樂在此」活動，二十三號會喺東方廣場舉行開幕禮，重請嚟財政司司長唐英年主持㖭。
蘭西
電郵地址：
