開講有話，殺人放火金腰帶，咁修橋整路呢？唔怕，有誠哥，就可以改變民間嘅偏見。
潮州出咗個李嘉誠，修橋補路，唔使憂冇人出錢。
話說李超人同中央領導提出佢喺河套區想興建一個汽車工業城嘅創舉之後，返到香港又去咗見煲呔同老董，睇個樣非常認真噃。
佢老哥之後原來返咗鄉下，主持潮州廣濟橋維修工程開工典禮，重發表演說，講吓橋樑嘅重要性，話世界上有咗橋樑，人類先至開始互相了解。
唔講唔知，潮州原來係歷史名城，呢條又名湘子橋嘅廣濟橋始建於南宋，與趙州橋、洛陽橋同蘆溝橋並稱為中國四大古橋，咁八方都認為李生捐成七百幾萬人民幣做善事值得嘉許，但人哋之前話要起港珠澳大橋好似有少少保留，唔通真係因為廣濟橋係一座歷史文物，而港珠澳大橋就會污染珠江三角洲嘅水文生態？
（圖）誠哥同潮州市人民政府市長駱文智（左）喺廣濟橋復修動工禮後留影。
傳真︰2623-9278
電郵︰