常言道「萬事起頭難」，初結識女朋友，要更進一步唔容易。正所謂「媾女容易拖手難」，只要拖到手仔，感情肯定邁進一大步。不過身體接觸呢樣嘢，既要膽大心細面皮厚，更要機緣巧合兼就手，你估咁易㗎。想問有冇速成班？當然有啦，重易過借火，一次瀑布半天遊，包你搞掂！
記者︰鍾可強
攝影︰林栢鈞
阿Sum啱啱喺公司力排強敵奪得Pinky芳心，但就苦無良計突破「疏離」關係，手仔都未拖過，阿Sum好心急，怕臨尾香，點算？點解你唔諗吓行山呢？阿Sum仔。「唉！Pinky弱質纖纖，腳仔軟㗎。」咁咪啱囉，你都係等呢個機會逞英雄，抱美人啫。一言驚醒夢中人，阿Sum立即精心部署呢次「大埔梧桐寨瀑布」之旅，咪咗幾晚旅遊天書，胸有成竹，重話呢鋪一定係代表作！
一個風和日麗嘅周六，阿Sum終於帶住心儀嘅Pinky，到達位於梧桐寨村的出發點，立即就要作出抉擇。左手邊有分岔山路，一邊去雞公坑，另一邊落井底瀑，亦即下瀑，唔使諗，去下瀑。兩人沿途小心翼翼，因為小部份山路窄且有崩缺現象，一不留神隨時跌落山坑，一直有距離嘅初識小戀人，亦因為地勢險要而靠近了不少。
順着指示牌提示，兩人很輕易找到下瀑。雖然景觀好靚，但看來看去也看不出何以叫做井底瀑。直至有一隊行山隊路經，聽啲專家解釋，要確認井底瀑，一定要爬上瀑布的中間一截向上看，方才了解井底之蛙嘅真諦。阿Sum跟住行山專家爬上瀑布中層，原來才十足十身處井底。不過，佢爬上瀑布期間，令Pinky替佢死咗好多細胞，因為實在太危險。
「下次唔好啦，人哋擔心你㗎。」Pinky半責備半關心咁埋怨。「知道，我下次一定問准你先至行動。」Pinky帶着愉快嘅微笑，大步大步跟隨阿Sum拾級而上，向中瀑前進。
佢唔知係咪開心過頭，腦海仍回味阿Sum聽話嘅模樣，一下踩錯腳，呢嘢非同小可，阿Sum飛撲扯實佢。「Pinky，小心啲呀，呢啲接近瀑布嘅山路，又濕又滑，跌親都事小，跌落山就冇命。以前有唔少行山嘅都係咁樣出意外，死過人㗎！」
面青青驚魂未定嘅Pinky，完全靠近阿Sum，並且主動伸出右手拖住阿Sum。由起點走到下瀑嘅路程只需十多分鐘，但今次由下瀑行上中瀑，明顯崎嶇難行，因為地勢較傾斜，花了半小時有多，Pinky先至勉強行到中瀑，呢個就係俗稱馬尾瀑嘅梧桐寨第二瀑。瀑布比下瀑壯觀，更有氣勢，風景更美。加上Pinky開始腳軟，兩個人坐喺度傾咗成粒鐘都未捨得走，剛才上山嘅辛苦，喺足夠休息下，已漸漸忘記。
不過，最後上主瀑嗰一程路，對一個坐慣寫字樓嘅OL嚟講，簡直係人生最大體力挑戰。Pinky足足花咗個半鐘先至行到接近五百米嘅主瀑，一般人四十五分鐘左右已經搞掂。但係，原諒Pinky啦，呢個真係佢嘅極限嚟㗎。雖然當中阿Sum又拉又抱先上到頂。咦！呢個咪係阿Sum此行嘅目的，佢真係搞掂咗喎。
睇住呢條全港最長嘅瀑布，呢對感情大突破嘅新戀人，在飛瀑旁喁喁細語，羨煞不少遊人。「阿Sum，呢條主瀑究竟有幾長呀？」「大約三十六米㗎，係全港最長嘅。拍得住我對你嘅長情啊。」「咦！好衰㗎。」Pinky一路講一路挨晒落阿Sum嘅胸口上面，勢估唔到，一次瀑布大旅行，竟可以將兩人拉得如斯接近。回程嘅時候，Pinky攬得阿Sum更加實，因為佢雙腳發軟，半冇力狀態下完全倚靠阿Sum強壯嘅身體支撐住佢，咁先至唔使碌落山咋！
交通：大埔墟火車站乘巴士64K、65P或小巴25K前往，梧桐寨落車，由梧桐寨村上山。
旅行團：遊梧桐寨出團日期：11月2日。
查詢：
