被人換出場唔順超，怒踢水樽原來好大劑！曼聯射手雲尼斯達羅就因對捷克嘅歐洲國家盃外圍賽向荷蘭教頭艾禾卡特咁做，已經俾後者講明唔再用佢，即係話荷蘭對蘇格蘭嗰兩場附加賽，球迷都咪旨意見到雲佬。
艾禾卡特話雲佬冇可能再同中鋒古華特上陣，但係就話古華特係荷蘭最佳前鋒，即係踩雲佬國際賽唔夠班，所以雖然雲佬早輪向艾禾卡特道過歉，但係後者唔知記仇抑或自己以前教過蘇超班霸格拉斯哥流浪，所以對蘇格蘭冇有怕。
我求大俠心諗，艾禾卡特講過話就算荷蘭入決賽周，佢都會辭職，所以下個教練可能會用番雲佬，睇怕呢位曼聯猛將嘅國際賽生涯應該唔會就此玩完，今次當係受個教訓，下次唔好咁喇！
阿柏天尼前日以棄將身份重返聖西路鬥AC米蘭，主場球迷顯然冇忘記呢個球會舊將，佢每次掂波冇被噓不特止，球迷重成日大叫佢個名㖭；到佢被調離場又有熱烈掌聲歡送，都咪話唔感人。阿柏天尼喺比賽中無甚表現，而拉素又輸埋，但佢應該過咗個既感慨又安慰嘅一日。
拜仁慕尼黑今季一直唔多順境，國內外比賽都戰績麻麻，俾其他勁旅搶盡風頭。另外，佢哋官方合作夥伴AeroLloyd航空因無力償還債務而破產，話說拜仁啱啱至同AeroLloyd續長約，冇咗個夥伴照住，拜仁由今場作客里昂開始，以後都要幫襯其他公司，唔知皮費會唔會重啲呢？
熱刺前日反勝李斯特城，第一次代表熱刺上陣即入波嘅南非球員馬比斯拉，功不可沒。據我求大俠所知，佢初嚟甫到時承認俾隊友排斥兼患思鄉病，而熱刺臨時領隊柏列特亦話知呢個問題存在，但有信心擺平。𠵱家馬比斯拉開心入波，睇嚟柏列特已經搞好將士不和問題。