由大馬路行去交易廣場美國會飲茶，必定經過遮打道九號（即以前嘅太古大廈）；置地公司嘅大廈，全部有天橋相連，方便行人嘅程度，世界第一。遮打道九號商場內，碰眼碰鼻都係名牌「阿曼尼」，對女士嘅吸引力好大，可幸左丁山冇乜錢，不受引誘，次次都係直行直過，唔知道有乜嘢靚貨色。
此日經過商場，碰到好耐唔見嘅朋友K，佢遞上名片，左丁山講一句：「哦，喺JardineFleming呀？」老友K即刻話：「閘住，千祈唔好叫Jardine（渣甸），叫Fleming還可以，我哋唔係用渣甸呢個名。」唔使咁嚴重呀嗎？我哋啲老鬼，見到JF兩個字就叫慣JardineFleming，一時之間，轉唔到口。但係JF俾大通買咗，大通又與摩根合併，三間大型商業?商人銀行加埋基金資產管理公司搬埋一齊，以遮打道九號為大本營，為咗統一品牌，「渣甸」呢個名就要徹底掃除咯。老友K都幾硬淨，歷經大變，都重可以派JF嘅名片，唔知係唔係學到馮道啲精神呢！
好多公司收購合併之後，隔一兩年就要統一品牌，情願大幅撥備，撇除商譽，都唔要舊招牌。香港在七○年代，三間得風氣之先嘅首創商人銀行（𠵱家跟美國佬叫法——投資銀行）——JF（怡富）、Wardley（獲多利），以及Schroders（寶源），𠵱家統統改晒名，新一代怕唔知道呢三間嘢以前幾巴閉咯。